ԱՄՆ իշխանությունները ծրագրում են փակել Մեքսիկայի հետ սահմանին հայտնաբերված գաղտնի թունելը

ԱՄՆ իշխանությունները կլցնեն ԱՄՆ-Մեքսիկա սահմանին հայտնաբերված գաղտնի թունելը։ Այս մասին հայտնում է CBS News-ը։

Մեքսիկայի Սյուդադ Խուարես քաղաքի և Տեխաս նահանգի Էլ Պասո քաղաքի միջև թունելը հայտնաբերվել է հունվարի 10-ին։ Սյուդադ Խուարեսի կայազորի հրամանատար, գեներալ Խոսե Լեմուսն ասել է, որ մաքսանենգներից երկար ժամանակ է պահանջվել՝ 1 կամ 2 տարի՝ թունելի կառուցման համար։

Մեքսիկական կողմից թունելը մոտ 300 մետր երկարություն ունի, հագեցած է լուսավորությամբ, օդափոխությամբ և ամրակցված է փլուզումների դեմ: Թունելը թաքնված է քաղաքների միջև գործող ջրատար կոյուղու մեջ։ Բարձրությունը մոտ 2 մետր է, իսկ լայնությունը՝ 1,2 մետր։ Մեքսիկայի գլխավոր դատախազությունը հետաքննում է տեղի իշխանությունների հնարավոր մեղսակցությունը, որոնք «չեն նկատել» թունելի շինարարությունը։

Իր երդմնակալության արարողությունից առաջ ԱՄՆ նորընտիր նախագահ Դոնալդ Թրամփը ելույթ ունեցավ Վաշինգտոնում աջակիցների առաջ, որտեղ նա խոստացավ «կանգնեցնել» անօրինական միգրանտների մուտքը երկիր Մեքսիկայի հետ սահմանով։