«Հաալանդը թող հեռանա Ռեալ»․ Շիրերը՝ Պրեմիեր լիգայի ռմբարկուների ռեկորդի մասին

«Նյուքասլի» և Անգլիայի հավաքականի նախկին հարձակվող Ալան Շիրերը խոստովանել է, որ կցանկանար պահպանել Պրեմիեր լիգայի պատմության լավագույն ռմբարկուի իր ռեկորդը։ Նրա կարծիքով՝ եթե «Մանչեսթեր Սիթիի» հարձակվող Էրլինգ Հաալանդը առաջիկա տարիներին տեղափոխվի այլ առաջնություն, ռեկորդը դեռ որոշ ժամանակ կմնա անգերազանցելի․ փոխանցում է BBC Sport-ը։

Շիրերը Պրեմիեր լիգայում անցկացրած 14 տարիների ընթացքում խփել է 260 գոլ։ Հաալանդն իր հերթին չորս մրցաշրջանից մի փոքր ավելի ժամանակահատվածում արդեն դարձել է 120 գոլի հեղինակ։ Եթե նորվեգացին շարունակի հանդես գալ «Մանչեսթեր Սիթիում», ապա կարող է գերազանցել Շիրերի ցուցանիշը։

Մինչև Հաալանդը ռեկորդին մոտ էր Հարի Քեյնը, որը 2023 թվականին «Տոտենհեմից» տեղափոխվեց Մյունխենի «Բավարիա»՝ կանգ առնելով 213 գոլի վրա։

«Վստահ եմ՝ մի օր ռեկորդը կգերազանցվի, բայց քանի դեռ այն իմն է, կվայելեմ այդ հանգամանքը։ Եթե առաջիկա մի քանի տարում կարողանանք Հաալանդին ուղարկել Մադրիդի «Ռեալ» կամ մեկ այլ ակումբ, ապա ամեն ինչ լավ կլինի»,- BBC-ին տված հարցազրույցում ասել է Շիրերը։

56-ամյա նախկին ֆուտբոլիստը հարցազրույցում անդրադարձել է նաև «Նյուքասլի» հետ իր կապին, ֆուտբոլիստի կարիերան ավարտելուց հետո մարզչական աշխատանքի անցնելու փորձին և հեռուստամեկնաբանի գործունեությանը։

Շիրերը 15 տարեկանում հեռացել է հարազատ Նյուքասլից և տեղափոխվել «Սաութհեմփթոն»։ Նա խոստովանել է, որ այսօր, երբ իր երեխաները հասել են նույն տարիքին, դժվարանում է պատկերացնել, թե ինչպես են ծնողները թույլ տվել իրեն այդքան վաղ հեռանալ տնից։

1992 թվականին նա տեղափոխվել է «Բլեքբերն Ռովերս», որտեղ Քենի Դալգլիշի գլխավորությամբ նվաճել է Պրեմիեր լիգայի չեմպիոնի տիտղոսը։ 1996 թվականին Շիրերը վերադարձել է մանկության ակումբ՝ «Նյուքասլ», որտեղ անցկացրել է 10 տարի։ Այդ ընթացքում նա բոլոր մրցաշարերում մասնակցել է 405 հանդիպման և խփել 206 գոլ։

Ֆուտբոլիստի կարիերան ավարտելուց հետո Շիրերը 2009 թվականին ստանձնել է «Նյուքասլի» ժամանակավոր գլխավոր մարզչի պաշտոնը՝ մրցաշրջանի վերջին ութ խաղերի ընթացքում։ Սակայն թիմը դուրս է մնացել Պրեմիեր լիգայից, իսկ Շիրերն այլևս չի վերադարձել մարզչական աշխատանքի։

Նա պատմել է, որ հետագայում մի քանի հարցազրույց է ունեցել մարզչական աշխատանքի անցնելու համար և նույնիսկ առաջարկ է ստացել գլխավորելու «Քարդիֆը», սակայն որոշ հանգամանքներ փոխվել են, և նա հրաժարվել է այդ ճանապարհից։

Այժմ Շիրերը «Match of the Day» հաղորդման մշտական ֆուտբոլային փորձագետներից է, մեկնաբանում է Անգլիայի հավաքականի հանդիպումները և մասնակցում «The Rest Is Football» փոդքասթին։ Նա նշել է, որ Նյուքասլից Սալֆորդ՝ հաղորդման նկարահանումներին հասնելու և վերադառնալու ճանապարհը հաճախ իր համար վերածվում է 19-20 ժամ տևող օրվա։