«Վիլլան երբեք «Մանչեսթեր Յունայթեդ» չի դառնա»․ Կարագերի խոսքերը՝ դատական հայցի պատճառ

Անգլիական «Աստոն Վիլլա» ֆուտբոլային ակումբը հայտարարել է, որ իրավական գործընթաց կսկսի Անգլիայի հավաքականի նախկին պաշտպան, ներկայումս ֆուտբոլային փորձագետ Ջեյմի Կարագերի դեմ՝ նրա հնչեցրած «անընդունելի վիրավորանքների» պատճառով։

Ակումբի հայտարարությունը հրապարակվել է սոցիալական ցանցերում և ստորագրվել նախագահ Նասեֆ Սավիրիսի կողմից։ «Վիլլան» Կարագերին մեղադրել է ակումբին ու երկրպագուներին վիրավորելու մեջ՝ ընդգծելով, որ թույլ չի տա որևէ մեկին խոչընդոտել իր առաջընթացին անգլիական և եվրոպական ֆուտբոլում։

Վեճի պատճառը Կարագերի՝ այս շաբաթ «Stick to Football» փոդքասթում արած մեկնաբանություններն են։ Նա կարծիք էր հայտնել, որ «Աստոն Վիլլայի» գլխավոր մարզիչ Ունայ Էմերին կարող է հետաքրքրված լինել «Մանչեսթեր Յունայթեդը» գլխավորելու հնարավորությամբ։

Խոսելով Էմերիի մասին՝ Կարագերն ասել էր, որ իսպանացի մասնագետը, հավանաբար, կցանկանար կրկին գլխավորել մեծ ակումբ։ Նա նաև նշել էր, որ ֆուտբոլում գոյություն ունի որոշակի հիերարխիա, և ավելի բարձր կարգավիճակ ունեցող ակումբները կարող են իրենցից ցածր դիրքում գտնվող թիմերից հրավիրել ֆուտբոլիստների կամ մարզիչների․ փոխանցում է BBC Sport-ը։

««Աստոն Վիլլան» երբեք «Մանչեսթեր Յունայթեդ» չի դառնա»,- ասել էր Կարագերը՝ դիմելով ակումբի երկրպագուներին և օգտագործելով վիրավորական արտահայտություն։

Նրա խոսքերը քննադատության էին արժանացել «Վիլլայի» երկրպագուների շրջանում։ Ի պատասխան՝ Կարագերը սոցիալական ցանցերում պարզաբանել էր, որ երկրպագուներին լռելու կոչն արել է կատակով՝ հաշվի առնելով Էմերիի՝ «Մանչեսթեր Յունայթեդ» տեղափոխվելու հնարավորության մասին իր նախորդ մեկնաբանությունների պատճառով ստացած քննադատությունը։

48-ամյա նախկին ֆուտբոլիստը նաև նշել էր, որ տարիներ շարունակ բարձր է գնահատել Էմերիին և «Աստոն Վիլլային»։

Ավելի ուշ «Overlap Daily» հաղորդման ժամանակ Կարագերը կրկին անդրադարձել էր թեմային՝ ընդգծելով, որ Էմերիին համարում է Պրեմիեր լիգայի լավագույն մարզիչներից մեկը։ Նրա խոսքով՝ եթե «Մանչեսթեր Յունայթեդը» փնտրեր հնարավոր լավագույն մասնագետին, ապա պետք է դիտարկեր նաև Էմերիի թեկնածությունը։

Կարագերը շեշտել էր, որ չի պնդել՝ Էմերին անպայման կհեռանա «Վիլլայից», այլ միայն արտահայտել է իր կարծիքը։ Նա կրկին նշել է, որ երկրպագուներին ուղղված խոսքերը կատակ են եղել։