Իրանում դատարանը մահապատժի է դատապարտել հայտնի երգչին

Իրանական դատարանը մահապատժի է դատապարտել ռեփեր Ամիր Հոսեյն Մաղսուդլուին, որը հայտնի է Tataloo բեմական անունով, «Մուհամեդ մարգարեին վիրավորելու համար», հայտնում է The Guardian-ը։

Երաժիշտը 2018 թվականից ապրում էր Ստամբուլում, սակայն 2023 թվականի դեկտեմբերին թուրքական ոստիկանությունը նրան հանձնել է Իրանի իշխանություններին։ Այդ ժամանակվանից ի վեր նա գտնվում է Իրանում կալանքի տակ։

Tataloo–ն դատապարտվել է 10 տարվա ազատազրկման «մարմնավաճառություն» քարոզելու համար, ինչպես նաև մեղադրվել է Իրանի դեմ «պրոպագանդա» իրականացնելու և «անպարկեշտ բովանդակություն» հրապարակելու մեջ։

Հրատարակության համաձայն՝ Tataloo–ն հայտնի է դարձել Իրանի իշխանությունների հասցեին քննադատություններ հնչեցնելու շնորհիվ, սակայն 2017 թվականին նա կառավարամետ դիրքորոշում է որդեգրել և կոչ արել իրանցիներին 2017 թվականի նախագահական ընտրություններում քվեարկել պահպանողական առաջնորդ Իբրահիմ Ռաիսիի օգտին։