Գլխավոր դատախազի տեղակալն ընդունել է Գերմանիայի Դաշնային Հանրապետության արտակարգ եւ լիազոր դեսպանին

ՀՀ գլխավոր դատախազի տեղակալ Արմեն Դանիելյանն ընդունել է Հայաստանի Հանրապետությունում Գերմանիայի Դաշնային Հանրապետության արտակարգ եւ լիազոր դեսպան Ն.Գ. պարոն Հանս-Յոխեն Շմիդթին:

Կողմերը քննարկել են երկու երկրների իրավական համագործակցությանը վերաբերող հարցեր: Դեսպանը կարեւորել է Հայաստանի եւ Գերմանիայի Դաշնության իրավապահ մարմինների միջեւ քրեական գործերով իրավական օգնության բնագավառում դատախազության դերակատարումը եւ պատրաստակամություն հայտնել շարունակել համագործակցության հետագա զարգացմանը:

ՀՀ գլխավոր դատախազի տեղակալը բարձր է գնահատել ձեւավորված բարիդրացիական հարաբերությունները, որոնք նպաստում են հանցավորության դեմ պայքարում, օրինականության հաստատման գործում երկու երկրների միջեւ արդյունավետ համագործակցությանը, փորձի փոխանակմանը եւ ազգային կառուցակարգերի կատարելագործմանը:

Դեսպան Յոխեն Հանս-Շմիդթը վստահեցրել է, որ Հայաստանի համար կարեւոր նախընտրական այս ժամանակաշրջանում Գերմանիայի Դաշնությունը կշարունակի աջակցել իրականացնվող բարեփոխումներին՝ հաշվի առնելով Հայաստանի առանձնահատկությունները:

ՀՀ գլխավոր դատախազի տեղակալ Ա. Դանիելյանն իր հերթին վստահեցրել է, որ ՀՀ գլխավոր դատախազությունը լինելու է հետեւողական եւ արձագանքելու է քրեական հատկանիշներ պարունակող բոլոր ընտրախախտումներին, որոնք տեղ կգտնեն նախընտրական եւ ընտրական գործընթացներում:

Այդ նպատակով կստեղծվի աշխատանքային խումբ: