Մեզնից հեռացավ ծանրակշիռ խոսքով մտավորականը. Երևանը հրաժեշտ տվեց Արմեն Դուլյանին

Այսօր Երևանում գործընկերներն ու հարազատները վերջին հրաժեշտը տվեցին մեր ավագ գործընկեր՝ լրագրող, հրապարակախոս, հեռուստամեկնաբան   Արմեն Դուլյանին:

    Գործընկերները այսպես են հիշում Ազատություն ռադիոկայանից հանրությանը հայտնի Արմեն Դուլյանին՝    

«էպոխալ  կերպար, որի ձայնը պատկառանք ներշնչող, հետաքրքրություն առաջացնող էր պրոֆեսիոնալիզմի և այդ ամենի համադրությունն էր: Մարդ, որից շատ բան կարելի էր սովորել: Դուլյանը նաև հրաշալի քաղաքացի էր, ով չէր խորշում իր կարծիքը հայտնել անգամ այն դեպքերում ,երբ շատերը լռում էին »,- ասում է Նարեկ Գալստյանը:

 « Շատ հետաքրքիր , շատ պրոֆեսիոնալ լրագրող էր, բազմակողմանի զարգացած մարդ էր ու մտավորական: Ես խորհուրդ կտայի երիտասարդ լրագրողներին՝ կարդան Արմենի հրապարակումներն ու հոդվածները, դա ինքնակրթվելու յուրօրինակ միջոց կլիներ »,- Հայստանի ժուռնալիստների միությնա նախագահ Սատիկ Սեյրանյանն է ասել:

«Առանձին գույն էր, որ կպակասի Երևանից, որի տեղը ուրիշը չի լրացնի: Արմենը ուներ մշտական հարգանք նրանց հանդեպ, ում հետ հաց է կիսել »,- երտասարդ առաջնորդների դպրոցի ղեկավար  Արմեն Զաքարյանն է ասել:

Քաղաքական գործիչ Աղվան Վարդանյանն էլ իր հերթին բացառիկ ինտելեկտուալ մտավորական է համարել լուսահոգի Արմեն Դուլյանին, ում  վաստակը լրագրության մեջ՝ անմոռանալի է. «Զուսպ, հավասարակշռված, բազմագիտելիք էր: Նա նաև բարոյականուիթյան, տղամարդկության, մարդկայնության դաս էր սերնդի համար»:

Գնել Նալբանդյանն էլ հիշել է իր համագործակցությունը Դուլյանի հետ՝ այն բոլոր կառույցներից, որտեղ ինքը խմբագիր է եղել. «Ինձ բախտ է վիճակվել պարբերաբար տարբեր կառույցներում շփվել Արմենի հետ և միշտ գերագույն հաճույք եմ ստացել իր հետ շփումից, քանի որ բարձր գիտելիքների տեր մարդ էր, շատ յուրահատուկ հումոր ուներ: Նրբանկատ էր Արմենը, բարեկիրթ,  արդարամիտ: Նա հանուն արդարությա՝ն պատրաստ էր կանգնել ինչ-որ մեկի կողքին:

Նա վերջին շրջանում հրապարակախոսություններ էր գրում, ինչի պատճառով ազատեցին աշխատանքից»:

Հանրային ռադիոյի երկարամյա տնօրեն, մշակույթի նախկին նախարար և հաղորդավար Արմեն Ամիրյանը ուսանելի է համարել Դուլյանի ոչ միայն ստեղծագործածը, այլև նրա ապրածը՝ ամբողջ իմաստով

«Նա որպես լրագրող միշտ ուսանելի էր… Արմենի ապրած կյանքը դասագիրք էր մեզ համար»:

Արմեն Դուլյանին Երևանում վերջին հրաժեշտը տվեց նաև Ազատության նրա Մոսկովյան թղթակից ընկերուհին՝ Ազա Բաբայանը: Ազայի համար Դուլյանը  Երևանյան էլիտայի ներկայացուցիչ էր,  մեծահոգի, բարեկիրթ տղամարդ, նա մտավորական էր իր ամբողջ էությամբ:

Արմեն Դուլայնի վերջին ղեկավարը՝ «Սպուտնիկ Արմենիա» լրատվական գործակալության խմբագիր Դմիտրիյ Պրիսենկոյի խոսքով՝ Դուլյանը  առասպելական բնութագիր ուներ. «Բարձր ինտելեկտով, հումորով, սառնասիրտ տղամարդ էր  ու իսկական ընկերասեր»:

Շանթի հեռուստամեկնաբան Արտյոմ Երկանյանը նկատել է, որ երիտասարդերը փորձում էին հաճախ նմանվել նրան: «Դուլյանը բարձրացնում էր մեր լրագրության նշաձողը: Պրոֆեսիոնալ կերպար էր, մտավորական»:

ԱԺ պատգամավոր Գառնիկ  Դանիելյանի խոսքով ամենահարգված լրագրողներից մեկն էր Դուլյանը, ով ամեն ինչում բարձր նշաձող ուներ. «Նա  մտավորական էր: Դուլյանը ծանրակշիռ խոսքը ուներ,   համոիչ էր էկրանից: Մենք ազգովի մեծ կորուստ ունեցանք՝ հայրենասեր մարդու, տղամարդու կերպարով ու այդ բացը ոչ ոք չի լրացնի»:

Աշխատել է Հայաստանի մի շարք հեռուստաընկերություններում, տեղական և միջազգային ռադիոկայաններում, մի շարք հոդվածներ է տպագրել պարբերական մամուլում:

Արմեն Դուլյանը ծնվել է 1953 թվականի մայիսի 26-ին, Երևանում՝ աշխարհագրության պրոֆեսոր Սուրեն Դուլյանի և տնտեսագետ Կլավդիա Պոսոշնիկովայի ընտանիքում։ Ըստ Բախտիար Հովակիմյանի «Սայաթ Նովան և նրա սերունդը» աշխատության, ինչպես նաև Լյուդվիգ Դուլյանի ուսումնասիրությունների, Արմեն Դուլյանի հորական Մարո տատը եղել է Սայաթ-Նովայի ծոռը։

Ավարտել է Երևանի թիվ 114 անգլիական թեքումով դպրոցը։ Դպրոցական տարիներին մասնակցել է միջին անգլերենով շեքսպիրյան բեմադրություններին՝ խաղալով գլխավոր դերերը (Համլետ, Ռոմեո և այլն)։ Այդ բեմադրություններին մասնակցել են նաև ՀՀ 4-րդ նախագահ Արմեն Սարգսյանը, նրա կինը՝ Նունե Սարգսյանը, քաղաքական և պետական գործիչ Դավիթ Շահնազարյանը, հրապարակախոս Բագրատ Սադոյանը և ուրիշներ։ Բեմադրիչը եղել է դերասան Սարգիս Չրչյանը (խաղացել է Ռուբեն Հախվերդյանի «Սատանայի ջրաղացը» հեռուստատեսային ներկայացման մեջ)։

 Դպրոցն ավարտելուց հետո Արմեն Դուլյանն ընդունվել է Երևանի պետական համալսարանի ռուսաց լեզվի և գրականության ֆակուլտետ, սակայն առաջին կուրսն ավարտելուց հետո մեկնել է պարտադիր զինծառայության։ Երկու տարի Խորհրդային զինված ուժերում ծառայելուց հետո Երևանում աշխատանքի է անցել «Արմենպրես» գործակալությունում՝ որպես թարգմանիչ։ Աշխատանքին զուգահեռ հեռակա սովորել և ավարտել է Երևանի պետական համալսարանի իրավաբանական ֆակուլտետը։

Հայաստանի անկախացման գործընթացի շրջանում աշխատանքի է տեղափոխվել ՀԽՍՀ Գերագույն խորհրդի արձանագրությունների բաժնում։ 1990-ականների առաջին կեսին գործընկերոջ հետ հիմնադրել է Հայաստանում առաջին անկախ «Սնարք» գործակալությունը, որի բաժնետերերի ցանկից դուրս է թողնվել մի քանի տարի անց։ 1990-ականների սկզբին աշխատել է ռադիո «Ռոսիայի» երևանյան թղթակից, հոդվածներ է հրապարակել տեղական մամուլում։ 2014-2016 թվականներին հրապարակախոսական հոդվածաշարով հանդես է եկել «Առավոտ» օրաթերթում։

1992-1993 թվականներին Դուլյանը եղել է ՀՀ պաշտպանության նախարար Վազգեն Մանուկյանի մամուլի քարտուղարը։ Պաշտոնից ազատվել է նախարար Մանուկյանի հետ միաժամանակ։

1994 թվականից նա Երևանից ռադիոռեպորտաժներ է պատրաստել «Ազատություն» ռադիոկայանի համար, 1995-ին որպես ռադիոմեկնաբան մշտական աշխատանքի անցել նույն ռադիոյի Մյունխենի կենտրոնակայանում, մինչև 2005 թվականն աշխատանքը շարունակել Պրահայի կենտրոնակայանում։ 2005 թվականի նոյեմբերին տեղափոխվել է ռադիոկայանի երևանյան գրասենյակ՝ աշխատելով որպես ավագ լրագրող։ 2008 թվականի ամռանը, ստեղծագործական-աշխատանքային մոտեցումների շուրջ վեճի պատճառով, հրաժարվել է շարունակել աշխատանքն «Ազատություն» ռադիոկայանում։

Մի քանի ամիս անց Հայաստանի հանրային հեռուստատեսության ուղիղ եթերում սկսել է վարել «25 րոպե» քաղաքական-վերլուծական հաղորդումը։ Միաժամանակ, Հանրային ռադիոյի «Ռադիոլուր» ծրագրում պատրաստել և հնչեցրել է «Մամուլի տեսություն» հաղորդաշարը։ Գրեթե մեկ տարի անց՝ համարելով, որ զրույցի արժանի գործիչների ցանկը սպառել է, հրաժարվել է «25 րոպե» հաղորդաշարը շարունակելուց։ Դրանից որոշ ժամանակ անց աշխատանքը նրա հետ դադարեցրել է Հանրային ռադիոն։

2010 թվականին աշխատանքի է անցել «Շանթ» հեռուստաընկերության «Հորիզոն» լրատվական ծրագրում՝ հանդես գալով միջազգային լուրերի մեկնաբանությամբ, ապա և վարելով լուրերի գլխավոր թողարկումը։ 2013 թվականի ամռան սկզբին հեռացվել է աշխատանքից՝ գործող իշխանավորների ու նրանց լրատվական պատասխանատուների մասին ֆեյսբուքյան գրառման համար։

Աշխատանքի առաջարկ ստանալով «Կենտրոն» հեռուստաընկերությունից, հիմնել է հեղինակային քաղաքական-վերլուծական ամենօրյա հաղորդում։ 2018 թվականի մարտ ամսին «Կենտրոնի» նոր տնօրենությունը դադարեցնում է Դուլյանի հաղորդումները՝ պատճառաբանելով դրանց «ցածր վարկանիշը», սակայն որևէ կոնկրետ վարկանշային հետազոտություն չվկայակոչելով։ Հեռացման իրական պատճառն այդպես էլ չի բացահայտվում։ 2019-ից աշխատել է Ազատություն ռադիոկայանում: