ՍԴ որոշմամբ՝ ենթադրաբար ապօրինի գույքը պետք է ուղղակի կապ ունենա անձին վերագրվող հանցանքի հետ. սահմանադրագետ

Սահմանադրագետ Գոհար Մելոյանը ֆեյսբուքյան իր էջում գրում է. «2020 թվականի ապրիլի 16-ին ընդունվեց «Ապօրինի ծագում ունեցող գույքի բռնագանձման մասին» օրենքը, որի արդյունքում ներդրվող ինստիտուտն ակնհայտ հակասահմանադրականության խնդիր ուներ, օրենքն էլ՝ հակաիրավական ու խնդրահարույց տարրեր։

Արդյունքում՝ հարուցվել են 100-ից ավելի հայցեր։ Պրակտիկայում մեր ամենամեծ խնդիրն այն էր, որ ապօրինի ծագում ունեցող գույքի բռնագանձման վարույթով անցնող անձը մեղադրվում էր, դիցուք՝ մի հանցանքի համար, որը ենթադրաբար կատարվել էր 2014-2015 թթ., բայց նրանից ուզում էին բռնագանձել գույք, որը վերջինս ձեռք էր բերել, օրինակ՝ 1995 կամ 2003 թվականներին, ու այդ գույքը որեւէ կապ չուներ հանցագործության դեպքի հետ

Ըստ՝ ՍԴ որոշման հրապարակված եզրափակիչ մասի, այսուհետ՝ ենթադրաբար ապօրինի գույքը պետք է ուղղակի կապ ունենա անձին վերագրվող հանցանքի հետ։ ՍԴՈ 1776 որոշումը դեռ պետք է հրապարակվի, հասանելի է միայն եզրափակիչ մասը, բայց ակնհայտ է, որ էականորեն սահմանափակվելու է այս հակաիրավական օրենքի կիրառումը»։