ՍԴ–ն ստացել է ՄԻՊ–ի դիմումը

Ինչպես հայտնի է, օրերս ՀՀ Մարդու իրավունքների պաշտպան Կարեն Անդրեասյանը հայտարարեց, որ դիմելու է ՍԴ՝ պահանջելով հակասահմանադրական ճանաչել զրպարտության եւ վիրավորանքի հոդվածներում կատարված վերջին փոփոխությունը։ Հիշեցնենք, որ այդ հոդվածները, օմբոււդսմենի ակտիվ նախաձեռնությամբ եւ լոբբինգով, ապաքրեկանացվեցին, ինչից հետո սկսվեց իսկական արշավանք ընդդեմ մամուլի։ 

Հարցի շուրջ ԼՈՒՐԵՐ.com-ի թղթակցին ՄԻՊ-ի գրասենյակի մամլո քարտուղար Մարիամ Բարսեղյանը ասաց, որ նախորդ շաբաթ Կարեն Անդրեասյանը զրպարտության և վիրավորանքի վերաբերյալ ՀՀ քաղաքացիական օրենսգրքի դրույթների հակասահմանադրականության խնդրով դիմել է ՀՀ Սահմանադրական դատարան սույն օրենքում հստակեցում մտցնելու հարցով: Իր հերթին սահմանադրական դատարանի մամլո քարտուղար Հովհաննես Պապիկյանը lurer.com-ի թղթակցի հետ զրույցում հաստատեց, որ ՄԻՊ-ի դիմումը գտնվում է ՍԴ-ում: «Այսօրվա դրությամբ ոչինչ պարզ չէ քանի որ պետք է գործի քննության ընդունելու հարցի կապակցությամբ հրավիրվի աշխատանքային նիստ, որտեղ կորոշվի նիստի օրը , ժամը և զեկուցող դատավորը», մեզ հետ զրույցում ասաց Պապիկյանը։

 Սահմանադրական Դատարանի մասին ՀՀ օրենքի 31 հոդվածում նշվում է, որ գործը ընդունվում է քննության, եթե առկա չեն սույն օրենքի 32-րդ հոդվածում նախատեսված գործի քննությունը մերժող հիմքեր: Սահմանադրական Դատարանի ընդունած որոշման մասին դատավարության կողմերը տեղեկացվում են եռօրյա ժամկետում: