Իմ շաբաթ-կիրակիներն անցնում են պատերազմների զոհերի ընտանիքներին ու բռնի տեղահանվածների տները այցելելով. լրագրողի պատասխանը` Խաչատուր Սուքիասյանին

Ես երբեք հրապարակայնորեն չեմ խոսել այն մասին, որ իմ շաբաթ-կիրակի օրերն անցնում են 44-օրյա և սեպտեմբերի 19-ի պատերազմների զոհերի ընտանիքներին, ինչպես նաև բռնի տեղահանվածների տները այցելելով։ Այս մասին իր ֆեյսբուքյան էջում գրել է լրագրող Նարեկ Կիրակոսյանը` պատասխանելով ՔՊ-ական պատգամավոր Խաչատուր Սուքիասյանին, որի հետ երեկ ԱԺ-ում միջադեպ էր տեղի ունեցել և վերջինս հունից դուրս էր եկել լրագրողի հարցից:

«Եթե չլիներ իրավապաշտպան Ժաննա Ալեքսանյանի գրառումը, գուցե երբեք էլ չանդադառնայի այս թեմային։

Մեկ օրվա մեջ Սյունիք, Տավուշ, Շիրակ, Գեղարքունիք և այլ մարզեր գնալ-գալը՝ ոչ թե «յութուբից գումար աշխատելու միջոց» է, ինչպես պատկերացնում է Խաչատուր Սուքիասյանը, այլ՝ մի պարտավորություն այն մարդկանց հանդեպ, ովքեր իրենց զավակներին տվել են հայրենիքին։ Դա սեփական ընտանիքի համար նախատեսված ժամանակը ուրիշ ընտանիքներին տրամադրելու ընտրություն է։ Այդ այցերն ու պատմությունները սենսացիա ստեղծելու նպատակ չունեն. դրանք պարտք են՝ խոսելու այն տղաների մասին, որոնք կյանք են տվել հայրենիքի համար։

Այսօր ԱԺ-ում իմ հարցերը, հարցապնդումներն ու պահանջած պարզաբանումները ոչ թե շոուի կամ հանրության ուշադրություն գրավելու փորձ էին, այլ պատասխան ստանալու ջանք՝ այն ծնողների անունից, ովքեր իրենց կյանքի ամենաողբերգական դեպքը՝ իրենց որդիների զոհվելու պատմությունները գրելը վստահել են ինձ։

Շնորհակալություն բոլոր նրանց, ովքեր այսօր գնահատեցին իմ արած աշխատանքը։ Այդ աջակցությունն ուժ է տալիս շարունակելու՝ չընկրկելով ոչ հարձակման, ոչ էլ անհեթեթ մեկնաբանությունների առաջ»: