Երևանի մուտքի մոտ նոր անտառային գոտի կհիմնվի. Ավինյան

Երևանի քաղաքապետ Տիգրան Ավինյանը գործակարգավարական խորհրդակցության ժամանակ հայտնել է, որ ապրիլի 19-ին Նոր Նորքի Սուրբ Սարգիս եկեղեցու հարակից տարածքում տնկվել է 1300 ծառ և 200 մշտադալար թուփ:

«Այդ տարածքում արդեն իրականացվել են շինբարեկարգման աշխատանքներ, կառուցվել է գեղեցիկ կասկադ, տեղադրվել են շատրվաններ, տարածքն ամբողջությամբ հագեցած է ոռոգման համակարգով: Շատ շուտով այդ հատվածում կտեսնենք գեղեցիկ և կանաչապատ տարածք»,- ասել է Ավինյանը:

Երևանի կանաչապատման և շրջակա միջավայրի պահպանության ՀՈԱԿ-ի տնօրեն Արմեն Բեգոյանը, քաղաքապետի առաջարկով, մանրամասն ներկայացրել է կատարված աշխատանքները. «Այս շաբաթվա ընթացքում մոտ 700 ծառով նոր անտառային գոտի ենք ստեղծում՝ որպես պաշտպանիչ գոտի Աշտարակից Երևան մտնող ճանապարհի լանջերին»:

Նա նաև նշել է, որ ամռանը կտնկվի 3000-4000 ծառ և թուփ: