Մեր աշխատակիցներից մեկը տնային կալանքի տակ է. Շենգավիթ վարչական շրջանի ղեկավարը՝ ձերբակալությունների մասին (տեսանյութ)
ՏեսանյութերԱնմեղության կանխավարկածը չխախտելով՝ ուզում եմ ֆիքսել, որ որևէ կոնկրետ բան չենք ուզում ասել այդ անձանց վերաբերյալ, բայց շատ լավ առիթ է արձանագրելու, որ կոռուպցիոն դրսևորումները մեզ համար անընդունելի են: Այդ մասին Երևանի քաղաքապետարանի գործակարգավարական խորհրդակցության ժամանակ հայտարարեց քաղաքապետ Տիգրան Ավինյանը՝ անդրադառնալով Շենգավիթ վարչական շրջանի աշխատակազմում վերջին ձերբակալություններին։
«Այս մակարդակում ինչքա՞ն պետք է նման գործողություններ տեղի ունենան, որ մենք խաղի կանոնները հասկանանք»,- ասաց Ավինյանը՝ դիմելով Շենգավիթ վարչական շրջանի ղեկավար Ռազմիկ Մկրտչյանին:
Վերջինս նախ շնորհակալություն հայտնեց ԱԱԾ և Հակակոռուպցիոն կոմիտեի աշխատակիցներին արդյունավետ աշխատանքի համար, ապա արձանագրեց, որ որոշ ԶԼՄ-ների կողմից տարածվել էին լուսանկարներ, որոնք կարող էին ապակողմնորոշել հանրությանը:
«Տպավորությունն այնպիսին էր՝ կարծես ինձ են ձերբակալել: Իրականում և՛ զավեշտալի էր, և՛ տխրեցնող...
Դեպքը տեղի չի ունեցել վարչական շենքում և վարչական ղեկավարի ներկայությամբ. դա ևս լրատվամիջոցների կողմից ամբողջությամբ հակառակ ուղղությամբ ներկայացվեց»,- ասաց նա:
Անդրադառնալով դեպքի մանրամասներին՝ Ռազմիկ Մկրտչյանը պարզաբանեց. «Մեր աշխատակիցներից մեկն այս պահին տնային կալանքի տակ է, նախաքննությունը շարունակվում է, որևէ այլ բան չեմ կարող ասել։ Կարող եմ փաստել և վերահաստատել մեր դիրքորոշումը, որ համայնքային բյուջեից 1 լումա անգամ գողանալը, մեղմ ասած, սրիկայություն է»։
Քաղաքապետ Ավինյանն արձագանքեց՝ խոսքը ոչ միայն համայնքային բյուջեից գողանալու մասին է, այլև ինչ-որ մի բան արձանագրել-չարձանագրելու համար կաշառք վերցնելու:
«Այդ բոլոր երևույթները մեզ համար անընդունելի են։ Ինչքա՞ն տեղի ունենա այս գործընթացը, որ մենք մշակութային ամբողջական փոփոխությունը կարողանանք կատարել։
Ես կարծում եմ՝ իրավապահ մարմիններն իրենց գործառույթը իրականացնում են և պետք է իրականացնեն, բայց մենք էլ անելիք ունենք համակարգային վերլուծության և լուծումների ինչ-որ տրամաբանությամբ, որովհետև այդ մակարդակում անընդհատ կրկնվող խնդիրը նշանակում է համակարգային խնդիր կա, և մոտիվացիոն այլ տրամաբանություն է պետք ներդնել, որովհետև հասկանում եմ, որ գայթակղությունը մեծ է»,- ասաց Ավինյանը։
Ավելի վաղ հայտնել էինք, որ Շենգավիթ վարչական շրջանի աշխատակազմում իրավապահները գործողություններ են իրականացրել, ինչի հետևանքով աշխատակիցներ են ձերբակալվել։ Քննչական գործողություններն իրականացվել են Հակակոռուպցիոն կոմիտեում քննվող քրեական վարույթի շրջանակում։
ՈՒՂԻՂ ԵԹԵՐ
Ամենադիտված 
Դիրքում բռնшբшրnւթյшն դեպքը տեսած, ապա սպшնված 3 զինվորների ծնողներն արդարադատություն են պահանջում (տեսանյութ)
