Այն, ինչ տեղի ունեցավ, ընդունելի չէր կարող լինել. փաստաբանը՝ լրագրողին դահլիճից հեռացնելու մասին

Փաստաբան Արամ Վարդևանյանը լրագրողների հետ ճեպազրույցում բացասական որակեց «Մարտի 1»-ի վերաբացված գործով դատական նիստի ժամանակ դատավոր Սարգիս Պետրոսյանի կողմից լրագրողին նիստերի դահլիճից հեռացնելը։

«Այն, ինչ տեղի ունեցավ, ընդունելի չէր կարող լինել, քանի որ խոսքի ազատության նկատմամբ որևէ սահմանակում ինքնին ծայրահեղ միջոց է հանդիսանում և, կարծես, խնդիրն այն հանգամանիքին էր վերաբերում, որ սույն գործը նախագահող դատավորը քաղաքական գործունեությամբ է որոշակի ժամանակահատված զբաղվել»,– ասաց փաստաբանը։

Բայց նաև մյուս կողմից ուզում եմ այն հանգամանքն էլ կարևորել, որ երբ որոշակի իմաստով նշված հանգամանքն այլ դիտանկյունից է դիտարկվում, կամ այլ կետից է գնահատական տրվում, միգուցե իր մեջ դրական տարրեր պարունակում է»,– հավելեց նա՝ նշելով, որ, այնուամենայնիվ, լրագրողի գործունեության սահմափակումը որևէ իրավիճակում դրական չի կարող գնահատվել, բայց այդ հանգամանքն ինքնին, որ այդ լույսի ներքո դիտարկվեց, հնարավոր է, որ դատարանի կողմից անաչառության, անկախության ձգտման որոշակի ազդակ լինի։

Հիշեցնենք՝ «Մարտի 1»-ի վերաբացված գործով դատական նիստի ժամանակ դատավոր Սարգիս Պետրոսյանը նիստերի դահլիճից հեռացրել էր Yerevan Today-ի լրագրողին՝ իրեն «նախկին ՔՊ-ական» ներկայացնելու համար։