Նոր ուղղություններից դեպի «Զվարթնոց» յուրաքանչյուր ուղևորի համար կառավարությունը կվճարի 20 հազար դր և «Շիրակ»՝ 15 հազար դր

«Ֆինանսական աջակցություն կտրամադրվի այն ավիաընկերություններին, որոնք նոր ուղղություններից ուղևորներին կտեղափոխեն դեպի Երևանի «Զվարթնոց» և Գյումրու «Շիրակ» օդանավակայաններ»,-կառավարության նիստում ասաց տարածքային կառավարման և ենթակառուցվածքների նախարար Դավիթ Խուդաթյանը՝ զեկուցելով ՀՀ օդային ճանապարհով իրականացվող ուղևորափոխադրումների զարգացմանն ուղղված աջակցության ծրագիրը:

«Ֆինանսական օժանդակությունը տրամադրվում է ավիաընկերության ամեն նոր ուղղությունից փոխադրած և Հայաստան մուտք գործած 2 տարեկանից բարձր տարիք ունեցող ուղևորի համար Գյումրու «Շիրակ» օդանավակայանի համար 1 ուղևորի հաշվարկով՝ 15 հազար դրամ, Երևանի «Զվարթնոց» օդանավակայանի համար՝ 20 հազար դրամ»,-հայտնեց նախարարը:

Նա նշեց, որ պարտադիր պայման է, որ շահառու ընկերությունը 1 նոր ուղղությամբ ուղևորափոխադրում իրականացնի դեպի Գյումրու օդանավակայան և ամեն նոր ուղղության համար ֆինանսական օժանդակությունը տրամադրվում է 2 տարի ժամկետով:

Խուդաթյանի խոսքով՝ նոր ուղղություններն են, այն քաղաքները որտեղ առաջին չվերթը սկսելու պահից նախորդող 12 ամիսների ընթացքում ցանկացած ավիաընկերության կողմից իրականացված չվերթերի քանակն ամառային ժամանակահատվածում չի գերազանցել 14-ը, իսկ ձմեռային ժամանակահատվածում՝ 10-ը:

Նիկոլ Փաշինյանն էլասաց, որ եթե Գյումրի բերում է նոր ուղղություն, իսկ Երևան չի բերում, կարող է դառնալ ծրագրի շահառու, բայց եթե Երևան բերում է նոր ուղղություն, իսկ Գյումրի չի բերում, չի կարող դառնալ ծրագրի շահառու: