Կներեք, որ այնքան անզոր ենք, որ Ձեզնից` 86 տարեկանում, աջակցություն ենք հայցում․ Շաքե Ավոյանը՝ Տիգրան Մանսուրյանին

Լրագրող Շաքե Ավոյանը կիսվել է ՀՀ ժողովրդական արտիստ, կոմպոզիտոր Տիգրան Մանսուրյանի՝ այսօր Ծիծեռնակաբերդի համալիրում տեղի ունեցած հարցազրույցով և գրել․

 

«Կներեք մեզ, սիրելի մաեստրո, կներեք, որ այնքան անկարող ենք ու այնքան անզոր, որ Ձեզնից` 86 տարեկանում, Ձեզնից ենք աջակցություն, փրկություն հայցում, Ձեզնից ենք խնդրում, պահանջում պայքարել, բարձրաձայնել ինչ֊որ բան, ու չենք էլ լսում, թե որքան է նվաղել Ձեր` չքնաղ մեղեդիներ ստեղծած ձայնը։ Կներեք, որ պահանջում ենք հերոս լինել, որովհետև չունենք այլ հերոսներ... Կներեք, որ Ձեր տաղանդը ոչ թե անխոցելի վահան է Ձեր անվերապահ հեղինակության համար, այլ այդ տաղանդը Ձեզ դարձնում է բաց թիրախ` մեր անհույս ակնկալիքների, մեր դառը բարկության առջև։ Կներեք, որ (մեղեդու աշխարհից դուրս) հերոս չեք... Ու թող օրհնվեն բոլոր այն անհայտ մարդիկ` իրենց բոլոր սերունդներով, որ օգնել են Ձեր ծնողներին փրկվել ցեղասպանությունից ու հայ ժողովրդին հնարավորություն են տվել` ունենալ Մաեստրո Տիգրան Մանսուրյան»։