Մեզ զարմացնել այլեւս հնարավոր չէ իշխանական ցինիզմով, բայց որ մարդուն տեսախցիկների առաջ 10 հոգով ծեծեն, ամեն ինչից վեր էր. Արմինե Օհանյան

«Հրապարակ» թերթի խմբագիր Արմինե Օհանյանը գրում է.

 

Մինչ ամբողջ հանրությունը սպասում էր, որ իրավապահները քայլեր կձեռնարկեն եւ կպատժեն չափ ու սահմանն անցած, գազանացած թաղապետին` կձերբակալեն, մեղադրանք կառաջադրեն: Սպասում էինք, որ Երեւանի քաղաքապետը նրան կազատի աշխատանքից, իսկ իր մայր կուսակցությունը` «Հանրապետությունը» կդատապարտի իր անդամի արարքը եւ հետ կկանչի նրան` ներողություն խնդրելով հանրությունից ու ծեծված քաղաքացուց, ճիշտ հակառակը եղավ: Նախ` իշխանությունը եւ իրավապահները ոչ մի քայլ չարեցին եւ փորձեցին ձերբակալել ծեծված բլոգերին` Արթուր Չախոյանին, որի մեղքը միայն այն էր, որ միայնակ գնացել էր Նոր Նորքի վարչական շրջան եւ փորձում էր հաշիվ պահանջել իր իսկ ձեւավորած իշխանությունից: Ապա քիչ առաջ հանդես եկավ նաեւ մայր կուսակցությունը` իրեն արեւմտամետ հռչակած «Հանրապետությունը», որը դատապարտեց ու զրպարտեց զոհին, հաթաթա տվեց իրեն բան ասողներին, ինչ որ անձանց եւ շրջանակների ականջները տեսավ կատարվածի ետեւում: Հայտարարեց, որ միջադեպն «ակնհայտ պլանավորված և կազմակերպված սադրանք էր, որի թիրախը վարչական շրջանի ղեկավարը կամ քաղաքապետը չէ, այլ ՀՀ անկախությունը և ինքնիշխանությունը»։ Թվաց, թե «ռոբասերժական» կամ ռուսամետ շրջանակներն են ստիպել իրենց թաղապետին` Տիգրան Տեր-Մարգարյանին, որ հենց իր աշխատասենյակի մոտ 10 հոգով ծեծի ենթարկի Չախոյանին:

Այս իշխանություններից մենք ամեն տեսակի ցինիզմ ու անամոթություն տեսել ենք, իհարկե: Տեսել ենք, թե ինչպես են թուրքի յաթաղանից մազապուրծ մեր հայրենակիցներին մեղադրում, որ չեն մնացել ու չեն զոհվել իրենց հողում: Տեսել ենք, թե ինչպես են հերոսաբար կռվող հայ երիտասարդներին դասալիք ու դավաճան անվանում եւ հայրենիքի համար արյուն թափած, առողջությունը կորցրած զինվորականներին բանտ նետում: Այնպես որ մեզ զարմացնել այլեւս հնարավոր չէ իշխանական ցինիզմով, բայց որ մարդուն տեսախցիկների առաջ 10 հոգով ծեծեն եւ հետո հայտարարեն, թե ծեծվողը մեր պետականության դեմ հանցանք է կատարել, եւ փորձել է դեպի Արեւմուտք մեր ընթացքը կասեցնել, ամեն ինչից վեր էր: Պարզվում է` ՔՊ-ից ավելի ցինիկ կուսակցական խմբեր էլ կան մեր երկրում: