Խելքը գլխին մարդը Փաշինյանի հետ չի բանակցի․ Լևոն Քոչարյան (տեսանյութ)

Ուզում եմ անդրադառնալ Նիկոլ Փաշինյանի անցած շաբաթվա հիստերիայի նոպային, հնչեցրած որոշ մտքերի. եթե նկատել եք՝ այդքան ջղաձգումների մեջ չի հայտնվում, երբ նրան անվանում են թուրք կամ դավաճան, բայց այ կոռուպցիայի հարցը նրան բավական մտահոգում է։ Այս մասին, այսօր՝ մայիսի 14–ին, ԱԺ-ում ելույթում ասաց «Հայաստան» խմբակցության պատգամավոր Լևոն Քոչարյանը։

«Սրբուհի Գալյանն ասում է՝ ընդդիմությունը սադրել է եւ եղել է սադրանքի պատասխան։ Սադրելը ո՞րն է, երբ ընդդիմադիր պատգամավորը կոնկրետ հարց է բարձրացնում, որը պահանջում է կոնկրետ պատասխան և այդ պատասխանը չի լինում ու դրա փոխարեն լինում են ներվային, հիստերիկ շարժումներ, որակումներ, սպառնալիքներ»,-նշեց նա։

Քոչարյանը խոսեց Փաշինյանի մեկ այլ հայտարարության մասին: «Ասում է՝ մարդկանց հետ հանդիպումների ընթացքում հարցնում են՝ ինչո՞ւ Ռոբերտ Քոչարյանը բանտում չէ: Բա գիտե՞ք մեզ հետ հանդիպումների ընթացքում մարդիկ ի՞նչ են ասում: Հարցնում են՝ ինչո՞ւ են դեռ այդ անհայրենիք դավաճաններն իշխանության»,- հայտարարեց պատգամավորը:

Անդրադառնալով Փաշինյանի՝ նախկին նախագահների բանավեճի հրավիրելու թեմային, Քոչարյանն ասաց. «Նիկոլ Փաշինյանը շատ լավ հասկանում է, որ խելքը գլխին մարդը չի գալու, չի բանավիճելու։ Դրանով ուզում է ցույց տալ, որ այ տեսեք, եթե չեն գալիս, ուրեմն ես ճիշտ եմ։ Այսինքն դուք լուրջ մտածում եք, որ օրինակ հայրս, ով 2008 թվականից նախագահ չի հանդիսացել, պետք է գա և բանավիճի նրա շուրջ, թե 2023-ին Արցախը ո՞վ է հանձնել։ Լավ, սա դուք լուրջ եք համարում

Կամ լուրջ մտածո՞ւմ եք, որ 30 տարի բոլորը բանակցել են Արցախը տալու շուրջ ու միայն «հանճարեղ» Նիկոլ Փաշինյանի՞ն է դա հաջողվել։ Արցախը տալու համար ընդամենը պետք էր անել այն, ինչ դուք արել եք՝ ճանաչել Ադրբեջանի կազմում։

Պատկերացրեք ինչ-որ մեկն ասում է՝ «լուսնի վրա կյանք կա, ա՛յ գիտնականներ, աստղաֆիզիկներ, եկե՛ք բանավիճենք դրա շուրջ, նրանք կասեն՝ հո դու հիմա՞ր չես։ Ու ինքն ասի՝ այ տեսաք, նրանք չեկան, ուրեմն ես ճիշտ էի»։