Տեղի է ունեցել Կանանց հարցերով խորհրդին կից աշխատանքային խմբի հանդիպումը

ՀՀ գենդերային քաղաքականության իրականացման 2025-2028թթ․ ռազմավարության շրջանակում 2025 թ․ ընթացքում կատարման ենթակա միջոցառումները քննարկելու նպատակով այսօր տեղի է ունեցել Կանանց հարցերով խորհրդին կից աշխատանքային խմբի հանդիպումը, որին մասնակցել են շահագրգիռ գերատեսչությունների, կանանց հիմնահարցերի ոլորտում ակտիվ գործունեություն իրականացնող միջազգային և հասարակական կազմակերպությունների ներկայացուցիչներ։

Ընդգծելով Ռազմավարության մշակման և իրականացման գործընթացում փորձագիտական համայնքի, զարգացման գործընկերների ակտիվ մասնակցության դերը՝ ԱՍՀ նախարարի տեղակալ Տաթևիկ Ստեփանյանը նշել է, որ անհրաժեշտ է նաև մեկտեղել բոլորի ռեսուրսներն ու ջանքերը՝ գենդերային ռազմավարության իրականացման շրջափուլերում ունենալու ճիշտ դերաբաշխում և աշխատանքների համակարգում։ Վերջինիս խոսքով՝ փաստաթուղթը հիմնավոր ներկայացնում է ոլորտը և հնարավորություն է տալիս կազմել ճանապարհային քարտեզ՝ ներդաշնակեցնելու տարիների ընթացքում համատեղ կուտակած փորձն ու իրագործված ծրագրերը։

Նախարարության մարդկանց թրաֆիքինգի և կանանց հիմնահարցերի բաժնի պետ Սոֆի Բոստանչյանը հանդիպման մասնակիցներին ներկայացրել է Ռազմավարության առաջնահերթություններն ու 6 գերակայությունները` անդրադառնալով հատկապես որոշումների կայացման գործընթացում կանանց մասնակցության խթանման, կրթության և գիտության ոլորտում գենդերային խտրականության հաղթահարման, կանանց և տղամարդկանց լիարժեք մասնակցության խթանման և հավասար հնարավորությունների ընդլայնման, ընտանեկան բռնության դեպքերի կանխարգելմանն ուղղված պետության քաղաքականությանը։

Քննարկվել է նաև 2025թ․ նախատեսվող միջոցառումների շրջանակում յուրաքանչյուր պատասխանատու գերատեսչության կողմից կատարման ենթակա աշխատանքները, ինչպես նաև հասարակական և միջազգային կազմակերպությունների հնարավոր աջակցության շրջանակը։

Քննարկման ընթացքում գործընկեր կազմակերպությունների անդամները հանդես են եկել առաջարկներով ու դիտարկումներով։

Հանդիպումը կազմակերպվել էր Եվրոպայի խորհրդի հետ համագործակցությամբ։