Գույքագրում ենք վնասները. էկոնոմիկայի նախարարը՝ կարկուտից տուժած գյուղացիների մասին

«Կարկուտը շատ մեծ վնասներ է տվել մեր գյուղատնտեսությանը, մասնավորապես Արարատի, Արմավիրի, Արագածոտնի և այլ մարզերում։ Ես նախորդիվ եղել եմ Արարատի մարզում, շաբաթ օրը ամբողջ օրը պլանավորված է, որ կլինեմ Արագածոտնի մարզում, մյուս բոլոր տեղերում, հիմա մեր աշխատանքային խմբերը մարզպետարանների, համայնքների, նախարարության հետ ակտիվորեն աշխատանքի մեջ են, վնասների գույքագրման համար, որից հետո արդեն համապատասխան որոշումներ կընդունվեն։ Կհասկանանք, ինչպես աջակցել մեր քաղաքացիներին, որպեսզի մեր գյուղատնտեսության կայուն զարգացման տեմպին չվնասենք»,– լրագրողների հետ զրույցում ասաց ՀՀ էկոնոմիկայի նախարար Գևորգ Պապոյանը։

Անդրադառնալով նրան, թե արդյոք հակակարկտային կայաններ աշխատել են, քանի որ կան պնդումներ, որ դրանգ գործել են կարկուտից հետո միայն, նախարարն ասաց. «Հակակարգիտային կայաններն աշխատում են, բայց դրանց արդյունավետության մասով պետք է նշել, որ հետևյալ իրավիճակ է. Կան ամպեր, որոնց դեպքում այդ թնդանոթային համակարգերի արդյունավետությունը 100% չէ։ Կան ամպեր, որոնց դեպքում 100%-անոց է ու բազմաթիվ դեպքեր են լինում, որ իրենք փրկում են իրավիճակը։

Այո, կրակել են հակակարկտային կայանները կրակել են, բացի Արարատի մարզի մեկ բնակավայրից, որտեղ մասնագետների կարծիքով, պատասխանատուների ներկայացմամբ, շատ ուժեղ անձրևային հոսք է սկզբում եղել, որի արդյունքում պրոբլեմ է առաջացել սարքի հետ և սարքը, ըստ էության, չի աշխատել։ Արարատի մարզի 1-2 գյուղում եղել է այդպիսի բան, բայց բայց դրա փոխարեն, օրինակ, կողքի 63 համակարգերը ամբողջությամբ աշխատել են»։

Հարցին՝ այդ դեպքում ի՞նչ լուծում են առաջարկում քաղաքացիներին, նախարարը պատասխանեց. «Մենք ևս մեկ լուծում ենք առաջարկել, դա այն է որ հակակարկտային ցանցերը նախկինում միայն սահմանափակ համայնքներում էր պետությունը սուբսիդավորում, այսուհետ Հանրապետության բոլոր համայնքներում հակակարկտային ցանցի դեպքում, ծախսի 50%–ը պետությունը վերցնում է իր վրա»։