«Ոստիկանությունում հաջողությունը պայմանավորված է նախևառաջ ծառայողների ներքին բարեփոխմամբ». Վլադիմիր Գասպարյան

Հունվարի 17-ին ՀՀ ոստիկանության պետ, գեներալ-լեյտենանտ Վլադիմիր Գասպարյանն ընդունեց ԵԽԽՎ մոնիտորինգի հանձնաժողովի համազեկուցող Ջոն Պրեսկոտին:

Անդրադառնալով եվրաինտեգրման գործընթացին՝ Վլադիմիր Գասպարյանը նշեց, որ բարեփոխումները ոստիկանությունում շարունակվում են: Նա, միևնույն ժամանակ ընդգծեց, որ հաջողությունը պայմանավորված է նախևառաջ ծառայողների ներքին բարեփոխմամբ՝ սկզբունքների, մտածողության, գործելակերպի փոփոխությամբ, որը զուգորդելով օրենսդրական դաշտի արդիականացմանը՝ հաջողությամբ կամփոփենք բարեփոխումների փուլը:

Ջոն Պրեսկոտը գոհունակություն հայտնեց ակներև փոփոխությունների առթիվ և այդ առումով կարևորեց ոստիկանության հանդեպ հասարակության վստահության ամրապնդումը:

Վլադիմիր Գասպարյանը նշեց, որ ոստիկանի նոր կերպարն ու գործելակերպը կփոխեն հասարակության վերաբերմունքը կառույցի հանդեպ: Այսօր կադրային, կառուցվածքային, գործառնական ծավալուն վերափոխումներ են կատարվում ոստիկանությունում, որոնց արդյունքում արտաքին ծառայության ստորաբաժանումներն ավելի սերտ կաշխատեն համայնքների հետ, տեխնիկական վերազինման շնորհիվ ճանապարհային ոստիկանության ոլորտում էապես կնվազեն կոռուպցիոն ռիսկերը, կանխարգելումը կդառնա մարտավարության գլխավոր բաղադրիչ: Ամեն ինչ կարվի, որ հասարակությունն ավելի պաշտպանված ու ապահով զգա իրեն՝ հավաստիացրեց ոստիկանության պետ Վլադիմիր Գասպարյանը:

Հանդիպման մասնակիցները քննարկեցին ընդհանուր հետաքրքրություն ներկայացնող այլ հարցեր ևս: