«Սա էներգետիկ ճգնաժամ է, ինձ հարկավոր են պատժամիջոցներ»․ Փաշինյանը ժամանակ է տվել Խուդաթյանին

Եկեղեցու և Կաթողիկոսի վերաբերյալ գրառումներից հետո Նիկոլ Փաշինյանը հրապարակում է կատարել նաև «Հայաստանի էլեկտրական ցանցեր» ՓԲԸ–ի մասին՝ հրապարակելով մայիսի 20–ին ՏԿԵ նախարար Դավիթ Խուդաթյանին իր ուղարկած հաղորդագրությունը։

Նամակում նա հայտարարել է, թե էներգետիկ ճգնաժամ է և հարկավոր են պատժամիջոցներ ՀԷՑ–ի նկատմամբ։

«Ինչպես տեսնում եք նկարից՝ տվյալ հանձնարարականը տվել եմ 2025 թվականի մայիսի 20-ին։ Այդ հանձնարարականի մասին իմացել են, չէին կարող չիմանալ ՀԷՑ-ում եւ որոշել են «կանգնել եկեղեցու կողքին»։ Հարգելի գործընկերներ, քիչ առաջ Հայաստանի պատմության թանգարում էի եւ էլեկտրականությունն անջատվեց։ Ասվածս չափազանցություն չհամարեք․ վերջին շրջանում չի եղել մի որեւէ այցելություն, որտեղ հոսանքը կամ գնացած չլինի, կամ ընթացքում չգնա։ Դպրոցներ, մանկապարտեզներ, մշակույթի տներ, հյուրանոցներ, ռեստորաններ։ Սեփական աչքով եմ տեսել։

Սա էներգետիկ ճգնաժամ է։ Ինձ հարկավոր չեն բացատրություններ, ինձ հարկավոր են պատժամիջոցներ կոնկրետ ՀԷՑ–ի նկատմամբ։ Ժողովրդին տված վնասը պետք է հատուցվի։ Ասեք՝ ինչպես։

Խնդրում եմ թեման չցրել։ Եթե ցրեցիք, գնալու ենք ՀԷՑ–ի ազգայնացման։ Ամբողջական եւ կտրուկ։ Ֆինանսական հատուցման մեխանիզմներ պետք է ներդրվեն։ Պարոն Խուդաթյան, կոնկրետ առաջարկներ տվեք։ Ժամկետը՝ 1 ամիս»,– գրել է Փաշինյանը։