Բոլոր վկաները տվեցին Կարախանյանի անունը

Այսօր՝ հունվարի 19–ին, Կենտրոն եւ Նորք-Մարաշ վարչական շրջանների ընդհանուր իրավասության դատարանում` դատավոր Մխիթար Պապոյանի նախագահությամբ, կայացավ ՀՀ ճանապարհային ոստիկանության նախկին պետ Մարգար Օհանյանի գործով հերթական դատական նիստը։

Նիստի ընթացքում հարցաքննվել են գործով անցնող չորս վկաները(ՃՈ 2-րդ սպայական գումարտակի 5-րդ վաշտի հրամանատար Վարդան Նարգիզյանը եւ 2-րդ վաշտի հրամանատար Արամ Գալստյանը: Ինչպես նաև Արսեն Մադոյանը և ՃՈ տնտեսական բաժանմունքի ավագ տեսուչ Եփրեմ Ստեփանյանը), իսկ հինգերորդ վկա Արմեն Կարապետյանը ներկայացրել է դիմում, որով հաստատում էր իր նախորդ ցուցմունքները և հայտնում, որ դատական նիստին չի կարող մասնակցել ՌԴ մեկնելու պատճառով։ Դատավոր Մխիթար Պապոյանը հարկ համարեց նշել, որ համապատասխան փաստաթուղթ ՌԴ մեկնելու վերաբերյալ առկա չէ որևէ փատաթուղթ, այդ պատճառով դատարանը չի կարող միայն այս դիմումի հիման վրա հարգելի համարել վկա Կարապետյանի բացակայությունը։ Սակայն դատարանը դեռ ձեռնպահ է մնում բերման որոշում կայացնելուց, դրան կանդրադառնան հետագայում։  

Գործով անցնող առաջին վկա Արսեն Մադոյանը հարցաքննության ընթացքում նշեց, որ առանձնապես կասկածներ չունի վառելանյութի իրացման հետ կապված. ստացել և օգտագործել է այնքան վառելանյութ, որքան որ ստորագրել է։ Անձնակազմից յուրաքանչյուրը ստացել է իրեն հասանելիք վառելանյութը։ Բեզինը ստացել են համպատասխան բաց կնիքով քարտով, որտեղ նշվել է մեքենայի համարանիշը։ Վկան նշեց, որ  28 տոննա բենզին փաստացի ստացել է  և բաժանել է, բայց ստորագերլ է 30 տոննայի տակ։ Իսկ պակաս քանակը, հետագայում չի վերադարձվել։  Իսկ այդ փաստաթղթի տակ ստորագրելը վկան պատճառաբանեց նրանով, որ գործով անցնող մյուս մեղադրյալ` ճանապարհային ոստիկանության սպայական 2-րդ գումարտակի հրամանատար Ստեփան Կարախանյանն է այդպես ասել նրան։

Գործով անցնող հաջորդ վկա Վարդան Նարգիզյանը – հունիս և հուլիս ամիսների իր ստացած 5000 և 4100 լիտր բենզինի փոխարեն ստորագրել է համապատասխանաբար 14 և12 տոննայի փաստաթղթի տակ։ Նարգիզյանը հարցաքննության ընթացքում նշեց, որ այդ փաստաթղթերի տակ ստորագրել, իր տեղակալ Կարապետյանի միջոցով, հանձնարարել է Ստեփան Կարախանյանը։ Այդ ամիսների պակաս ստացածի փոխարեն Կարախանյանը վստահեցրել է, թե հետագայում պակասը կլրացվի: Իսկ Մարգար Օհանյանի անունը այդ խոսակցություններում, ըստ վկայի, չի շոշափվել։

Մյուս վկա Արամ Գալստյան նշեց, որ բենզին ստացել Ստեփան Կարախանյանից երկու փուլով՝ ամսվա սկզբին և ամսվա կեսին։ Ստանալուց անձամբ  կազմել է հաշվետվություն, ստորագրել է այդ հաշվետվության բլանկի մեջ, ամսվա վերջում՝ հաշվետվությունը ներկայացվել է Կարախանայնին։ Ինքը՝ Գալստյանը ստորագրել է 6-12 հազար լիտրի տակ, բայց ստացել է 4100, իսկ զորակոչային ամիսների՝ 5000 լիտր բենզին։ 

Գործով անցնող վերջին վկա, ՃՈ տնտեսական բաժանմունքի ավագ տեսուչ Եփրեմ Ստեփանյանը նշեց, որ իր գործոււնեության ընթացքում  որևէ չարաշահում չի եղել, փաստացի ցույց տված բենզինի նույն քանակը մուտք է գործել Ճանապարհային ոստիկանություն։ 

Հիշեցնենք, որ Մարգար Օհանյանը մեղադրվում է Քրեական օրենսգրքի երկու հոդվածներով` պաշտոնական դիրքը չարաշահելու և առանձնապես խոշոր չափի յուրացումներ կատարելու։ Ճանապարհային ոստիկանության նախկին պետը ձերբակալվել է 2011թ.–ի օգոստոսի 30–ին։ Հիշեցնենք, որ նրա՝ անազատության մեջ գտնվելու ընթացքում, Մարգար Օհանյանի ընտանիքը կարողացել է վերադարձնել պետությանը հասցված շուրջ 177.281.380 դրամի վնասը, բայց  իրենց մեղավոր չի ճանաչել։ Վերջինիս փաստաբան Մկրտիչ Վասակյանի խոսերով գումարը վերադարձվել է, քանի որ այդ յուրացումները կատարվել են իր պաշտպանյալի ղեկավարման օրոք։

Նիստը, կողմերի համաձայնությամբ, հետաձգվեց հունվարի 27-ին, ժամը 11:00–ին։