Մարգար Օհանյանը չի խեղճացել

Այսօր՝ հունվարի 19-ին, Կենտրոն եւ Նորք-Մարաշ վարչական շրջանների ընդհանուր իրավասության դատարանում ընթացավ ՀՀ Ճանապարհային ոստիկանության նախկին պետ Մարգար Օհանյանի գործով հերթական դատական նիստը: Նիստի ընթացքում հարցաքննվել են գործով անցնող հինգ վկաներից՝ չորսը։ Բացակայող վկա Արմեն Կարապետյանը միջնորդություն էր ներկայացրել, որպեսզի իր բացակայությունը հարգելի համարվի, քանի որ մեկնում է Ռուսաստանի Դաշնություն։ Դատավոր Մխիթար Պապոյանը, սակայն նշեց, որ այդ միջնորդությունը բացակայության համար բավարար հիմք չի կարող հանդիսանալ, քանի որ դա հաստատող փաստաթղթեր դիմումին կցված չկան։ 

Նիստի ավարտին ՃՈ նախկին պետը, պատասխանելով լրագրողների հարցերին, նշեց, որ իր ինքնազգացողությունը շատ լավ է, իրեն լավ են վերաբերվում, որ ինքը խեղճացած չէ և կապացուցի իր անմեղությունը։ «Արդեն կամաց–կամաց երևում է, որ ոչ մի բան իմ հետ կապ չունի», – ասաց Մ. Օհանյանը։ Նշենք, որ հարցաքննված չորս վկաների ցուցմունքներով, իրենք հիմնականում առնչություն են ունեցել ճանապարհային ոստիկանության սպայական 2-րդ գումարտակի հրամանատար Ստեփան Կարախանյանի հետ, իսկ Մարգար Օհանյանին այդ մասին ինչ–ինչ պատճառներով տեղյակ չեն պահել։ Մեղավորության ամբողջ բեռը կարծես թե ընկնում է Կարախանյանի վրա։ Պատասխանելով լրագրողների այն հարցին, թե պե՞տք է արդյոք սպասել հայտարարությունների, Մարգար Օհանյանն ասաց՝ «այո՛, իհա՛րկե, իմ ցուցմունքների ժամանակ»։ 

Դատական նիստը հետաձգվեց. այն կկայանա հունվարի 27–ին՝ ժամը 11:00–ին։