Անօրինական ծառահատումներ Տաշիրում չեն եղել, դա անցյալ տարվա հատատեղն է. «ՀայԱնտառ» ՊՈԱԿ

Հայաստանի բնապահպանները կրկին ահազանգում են։ Այս անգամ խոսքը վերաբերում է Տաշիրի շրջանի Մեծավան գյուղի մերձակա սոճուտներում այս քանի օրերի ընթացքում տեղի ունեցած ծառահատումերին։ Ինչպես հայտնում են 1in.am-ի մեր գործընկերները, իրենց ունեցած տեղեկություններով հատվել է մոտ 200- 250 սոճի, և խոսակցություններ են պտտվում, որ հատումներն իրականացվում են «ՀայԱնտառ» ՊՈԱԿ–ի կողմից։ 

Տեղեկությունների հավաստիությունը փորձեցինք ճշտել «ՀայԱնտառի» ՊՈԱԿ–ի փոխտնօրեն Արշակ Մանուկյանից։ «Անցած տարի մենք այդտեղ հատատեղ ենք ունեցել։ Դա անցած տարվա հատումների մասին է խոսքը», –ԼՈՒՐԵՐ.com-ի թղթակցի հետ զրույցում նշեց նա՝ հավելելով. «Բնապահպանական մարզային տեսչությունը եղել է, հաստատել է, որ դա անցած տարվա հատատեղն է, իսկ անօրինական հատումներ չեն եղել»։ Նրա խոսքերով, դա Գյուղատնտեսության նախարարության կողմից անցյալ տարվա համար հաստատված հատատեղային ֆոնդն է՝ 260 սոճի, որոնք հատվել են մինչև անցած տարվա դեկտեմբեր ամիսը։ 

«Անտառկառավարման պլաններով հաստատված են հատումները։ Անցյալ տարի ունեցել ենք 30 հազար խորանարդ մետրի հատումներ՝ Հայաստանով մեկ, ոչ միայն Տաշիրում, այս տարի՝ 35 հազար», – նշեց Ա. Մանուկյանը։