Հոկտեմբերի 27-ի գործով նախկին մեղադրյալ Նաիրի Բադալյանը պետությունից 10 մլն դոլարի փոխհատուցում է պահանջում

Այսօր լրագրողների հետ էր հանդիպել հոկտեմբերի 27-ի գործով ձերբակալված, այնուհետև արդարացված Նաիրի Բադալյանը՝ խոսելու իր՝ Եվրադատարանում ընդդեմ Հայաստանի Հանրապետության ներկայացված հայցի և ՀՀ-ում ընթացող դատավարության մասին։

Նաիրի Բադալյանը ներկայացրեց Եվրադատարան ներկայացված իր հայցի պատմությունը։ «1999 թ. նոյեմբերին ապօրինի մեղադրանքով ձերբակալվել եմ, այն դեպքում, երբ մեղադրանքը հերքվում էր արդեն ձերբակալման պահին, ենթարկվել եմ քաղաքականապես մոտիվացված խոշտանգումների, իսկ հաջորդ տարվա մայիսին ազատ արձակվելուց անմիջապես հետո սկսել եմ խոսել այդ մասին»,-ասաց Բադալյանը։

Նրա հավաստմամբ՝ իր բողոքներին ի պատասխան իր դեմ սկսվել է տեղեկատվական-քարոզչական պայքար, փորձել են իրեն ներկայացնել որպես պատասխանատվությունից պատահաբար խուսափած հանցագործ, որպեսզի ստիպեն հրաժարվել բողոքներից։

«Իմ կյանքի նկատմամբ ռեալ վտանգ էր ստեղծվել, ինչն ինձ ստիպեց քաղաքական ապաստանի խնդրանքով դիմել ԱՄՆ։ Միակ հայն եմ, ով ԱՄՆ-ից քաղաքական ապաստան է ստացել ֆեդերալ մակարդակով»։

Բադալյանը լրագրողներին ասաց, որ իր հանդեպ՝ անազատության մեջ գտնվելու ընթացքում, դաժան խոշտանգումների կիրառումն ապացուցվել է դեռևս առաջին դատական նիստերի ժամանակ, բայց հետագայում ապօրինի կերպով գործը կարճվել է։ Դրանից հետո Բադալյանն արդեն քաղաքացիական հայց է ներկայացրել՝ պահանջելով փոխհատուցում տրամադրել իրեն, սակայն հայցը մերժվել է, և միայն անցյալ տարվա մայիսի 24-ին՝ արդեն Եվրադատարան դիմելուց հետո, Կենտրոն և Նորք Մարաշ համայնքների ընդհանուր իրավասության դատարանը վերսկսել է գործը։ Դա ինքնըստինքյան նշանակում է, որ Եվրադատարանում արդեն գրանցված հայցը չի կարող քննվել մինչև ՀՀ-ում տվյալ գործի վերաբերյալ վերջնական եզրակացությունը։

Լրագրողների հարցին, թե ի՞նչ փոխհատուցում է պահանջում Նաիրի Բադալյանը, վերջինս պատասխանեց, որ խոսքը Հայաստանի համար մեծ, սակայն միջազգային իրավական նորմերով միանգամայն նորմալ չափի գումարի՝ տասը միլիոն ԱՄՆ դոլարի մասին է։