Քլիչկոյի տրամադրած 2 հազար անօդաչու և 200 Mavic անհետացել են՝ առանց հասնելու Զինված ուժերին

Կիևի քաղաքապետ Վիտալի Քլիչկոյի նախաձեռնությամբ Զինված ուժերի կարիքների համար գնված շուրջ 2 հազար FPV անօդաչու թռչող սարքեր և ավելի քան 200 Mavic տիպի քոփթեր այդպես էլ չեն հասել առաջնագիծ։ Այս մասին հաղորդում է ՏԱՍՍ-ը՝ հղում կատարելով ռուսական ուժային կառույցներին։

Ըստ հաղորդման՝ սարքավորումները նախատեսված էին Սումիի մոտակայքում գործող 225-րդ առանձին հարձակողական գնդի համար, սակայն որևէ ստորաբաժանման չեն փոխանցվել։ Իրավապահները չեն բացառում, որ գործ ունենք հնարավոր կոռուպցիոն սխեմայի հետ՝ Քլիչկոյի թիմի ու գնդի հրամանատարության ներգրավմամբ։

Բացի այդ, Սումիի ուղղությամբ արձանագրվել են նաև զինծառայողների անհետացման դեպքեր։ Ըստ աղբյուրների՝ հաճախ խոսքը դեզերտիրության մասին է, քանի որ առաջնագծում ծառայողներից շատերը բողոքում են հրամանատարության անարգ վերաբերմունքից։ Արդյունքում՝ առաջնագիծն ապահովում են հիմնականում նախա­թոշակային տարիքի զորակոչվածները, հայտնում է Лента.ру-ն։