Տեխասում ջրհեղեղը նահանջում է. Camp Mystic-ի շուրջ երկու տասնյակ աղջիկներ դեռ անհետ կորած են

Տեխասի կենտրոնական հատվածում հեղեղի հետևանքով զոհերի թիվը հասել է 24-ի, մինչ փրկարարները շարունակում են որոնողական աշխատանքները՝ հատկապես Camp Mystic քրիստոնեական աղջիկների ճամբարի տարածքում, որտեղ մոտ երկու տասնյակ երեխաներ դեռ անհետ կորած են համարվում, գրում է Reuters-ը։

Հինգշաբթի լույս ուրբաթ գիշերը ուժեղ տեղումները Գվադալուպե գետի շրջանում հանկարծակի ջրհեղեղ էին առաջացրել՝ բարձրացնելով ջրի մակարդակը 29 ֆուտով։ Գլխավոր հարվածը հասցվել է Սան Անտոնիոյից հյուսիս-արևմուտք՝ 137 կմ հեռավորության վրա գտնվող ճամբարին, որտեղից մոտ 237 մարդ է արդեն փրկվել, այդ թվում՝ ավելի քան 100-ը՝ ուղղաթիռներով։ Չնայած փրկարարների համար նպաստավոր է, որ շաբաթ օրը ջրերը սկսել են նահանջել, տեղումները շարունակում են մտահոգիչ մնալ՝ մինչև ժամը 19:00 հայտարարված հեղեղի վտանգով։

Տեխասի նահանգապետ Գրեգ Էբոթը հայտարարել է, որ փրկարար աշխատանքները կշարունակվեն առանց ռեսուրսների սահմանափակման։ Նախագահ Դոնալդ Թրամփն էլ վստահեցրել է՝ «մենք հոգ կտանենք նրանց մասին»՝ խոստանալով դաշնային աջակցություն: Տեղի իշխանությունները պարզաբանել են, որ հեղեղը տեղի է ունեցել առավոտյան շատ վաղ՝ առանց նախազգուշացման, ինչը թույլ չի տվել ժամանակին սկսել տարհանումը։ Weather Service-ի տվյալներով՝ տեղումները զգալիորեն գերազանցել են կանխատեսվածը՝ բարդացնելով կանխարգելիչ միջոցառումների իրականացումը։