Մեծ Բրիտանիան Իրանը համարում է իր ամենամեծ սպառնալիքներից մեկը․ Telegraph

Մեծ Բրիտանիան Իրանը համարում է իր ազգային անվտանգության ամենամեծ սպառնալիքներից մեկը, հաղորդում է The Daily Telegraph-ը՝ հղում անելով Մեծ Բրիտանիայի խորհրդարանական հետախուզության և անվտանգության հանձնաժողովի կողմից ձեռք բերված գաղտնի զեկույցին։

Ըստ պարբերականի՝ 100 էջանոց փաստաթուղթը, որի պատրաստումը տևել է երկու տարի, կներառի եզրակացություն իրանական հետախուզական ծառայությունների կողմից Մեծ Բրիտանիայում այլախոհներին ֆիզիկապես վերացնելու ենթադրյալ փորձերի մասին։ Զեկույցի հեղինակները, որը հիմնված է բրիտանական հետախուզության ծառայության իրանցի մասնագետների հետ հարցազրույցների և գաղտնի փաստաթղթերի ուսումնասիրության վրա, կխոսեն նաև այն վնասի մասին, որը, ենթադրաբար, Իրանից հաքերները հասցնում են բրիտանական ընկերություններին։