Շա՜տ մտածեցի Հայաստան գալու մասին, սակայն ձերբակալությունները չեն քաջալերում ինձ քայլերս ուղղելու դեպի հայրենիք. ամո՛թ է, հազա՜ր ամոթ. Արամ Ա կաթողիկոս

Մեծի տանն Կիլիկիո Արամ Ա կաթողիկոսը կոչ է արել վերջ տալ Հայ առաքելական սուրբ եկեղեցու շուրջ ստեղծված իրավիճակին։ 

«Ամո՛թ է, հազա՜ր ամոթ, մեր սիրելի Հայրենիքի՝ Հայաստանի կեանքի մեջ ստեղծված ներկա վատառողջ ու ապազգային մթնոլորտը։ Դժբախտաբար, հայերեն լեզվի բառերը բավարար չեն նկարագրելու իմ ցավն ու ընդվզումը։ Հատկապես վերջերս պարզված մթնոլորտը մեր ազգի երկու ազգակերտ ու հայրենակերտ կառույցների՝ Սուրբ Էջմիածնի ու Ազգային Ժողովի, ինձ համար խորապես ամոթալի է ու դատապարտելի։

Արդարեւ, որեւէ ազգի, եկեղեցու կամ կազմակերպության կյանքի մէջ սխալներ, բացթողումներ, բեւեռացումներ, առճակատումներ կարող են լինե, սակայն դրանք հարկ է, որ քննարկվեն հատուկ գործընթացների ճամփով եւ հանդարտ մթնոլորտի մեջ, որպեսզի կարողանան համապատասխան լուծումների հանգել։

Շուրջ վեց տարիներ ի վեր, դժբախտաբար, Հայրենիք չեմ այցելել։ Վերջին օրերին մտածեցի, շա՜տ մտածեցի Հայաստան գալու մասին, որպեսզի կարողանամ օժանդակել ստեղծված փոթորիկը նվազագույնը հանդարտեցնելու ուղղությամբ, սակայն, Ազգային Ժողովի ու ընկերային ցանցերու ճամփով եւ այլապես կատարված ու շարունակուող անմակարդակ, մեր բարոյական, հոգեւոր ու ազգային արժեքներին խոտոր համեմատող արտայայտությունները, ինչպես նաեւ կատարվող ձերբակալությեւնները չեն քաջալերում ինձ քայլերս ուղղելու դեպի Հայրենիք։

Սակայն, կմնամ միշտ հանձնառու, որեւէ ժամանակ գալու Հայրենիք եւ Գարեգին Բ. Ամենայն Հայոց Կաթողիկոսի, Հայաստանի վարչապետ Նիկոլ Փաշինյանի ու այլ պատասխանատուների հետ խորհրդակցելու, որպեսզի կարողանանք ստեղծված ծանր իրավիճակին Հայաստանը դուրս բերելու հարմարագույն լուծումներ որոնել»,- ասվում է Արամ Վեհափառի տարածած հայտարարությունում։