Լրագրողներին կարող են պարտադրել ցուցմունք տալ

ՀՀ զինվորական դատախազ Գևորգ Կոստանյանը, խոսելով լրատվամիջոցների կողմից բանակում տեղի ունեցող դեպքերի լուսաբանման մասին, ասաց, որ իրենք տեղեկատվության տարածման սահմանափակում չեն ցանկանում, բայց լրագրողները պետք է պատասխանատվությամբ մոտենան իրենց գործին։

«Զինված ուժերում հանցագործությունների քննարկման, լուսաբանման, տեղեկատվության տարածման ժամանակ ականատես ենք եղել բազմաթիվ դեպքերի, երբ տարածվում է ապատեղեկատվություն, և հասարակության լայն շրջանակների կողմից դա ընդունվում է որպես փաստ»,- ասաց Կոստանյանը։ Նա նշեց, որ յուրաքանչյուր հրապարակումից առաջ լրագրողները պետք է հնարավորինս ճշտեն գործի հանգամանքները, հետո նոր տեղեկատվություն տարածեն։

«Յուրաքանչյուր հանցագործության առնչությամբ տեղեկատվության տարածողը պետք է հրավիրվի բաժին, քանի որ լրագրողի կողմից ևս կարող են պարզվել հանգամանքներ, որոնք նախաքննության ընթացքում չեն բացահայտվել»,- ասաց զինդատախազը։

«Լրագրողներին դատական կարգով կարող են պարտադրել ցուցմունք տալ և հայտնել իրենց տեղեկատվության աղբյուրները, մինչդեռ նրանք բացարձակորեն են ընկալում տեղեկատվություն  չտրամադրելու իրենց իրավունքը»,- հավելեց Կոստանյանը։

Զինդատախազի խոսքերով՝ իրեն ամենևին չի ճնշում լրագրողների ակտիվ լուսաբանումը։ «Կառուցողական քննադատությունը միան օգուտ է բերում, իսկ հերյուրանքն ու ապատեղեկատվությունը ոչ միայն բանակն է հեղիանակազրկում, այլև ազդում է հասարակության բանակի հանդեպ վերաբերմունքի վրա։ Ես կատարում եմ իմ աշխատանքը, որի համար պատասխանատու եմ, իսկ դատաքննության ընթացքում արված ցանկացած հայտարարություն կարող է դիտվել որպես ճնշում դատարանի վրա»,-եզրափակեց Կոստանյանը։