Երեկվա իրադարձությունները հրահրվեցին ՔՊ-ական պատգամավորի կողմից․ պատգամավոր

«Դատարանից որևէ դրական ակնկալիքներ չունեմ, որովհետև մենք տեսանք, որ այս գործով բոլորին կալանավորեցին, պետք է հաշվի առնել նաև թե ո՞ր դատավորին է մակագրված»,- Ընդհանուր իրավասության քրեական դատարանի Ավանի մասնաճյուղի դիմաց ասաց ԱԺ «Հայաստան» խմբակցության պատգամավոր Էլինար Վարդանյանը։

Ընդդիմադիր պատգամավորն ասաց, թե ինչպես իրավապահ համակարգն, այնպես էլ դատավորների մեծ մասը դարձել են «իշխանության հլու կամակատարները»։

«Երեկ իրադարձությունները, որոնք տեղի ունեցան դատախազի աչքի առաջ, հրահրվեց ՔՊ-ական պատգամավորի կողմից և շարունակվեց ՔՊ-ական պատգամավորների և պատգամավորիկների կողմից»,-ասաց Վարդանյանը՝ նշելով, որ դատախազը լուռ կանգնած հետևում էր և սա այն դատախազն էր, որը հենց ինքն էր հաղորդում ներկայացրել Սամվել Կարապետյանի գործով։

«Մի դեպքում, երբ դատախազին հրահանգ է տրվում, որ պետք է կատարվի որոշակի գործողություններ, ինչ-որ անմիտ, փուչիկ գործեր կարվեն, ինքն այս պարագապյում շատ ակտիվ ու հտևողական է, իսկ այն պարագայում, երբ ամեն ինչ տեղի է ունենում իր աչքի առջև՝ այս դեպքում ինքը ոչ տեսնում է, ոչ լսում։ Այսպիսին է մեր իրավական համակարգը»,-ասաց Վարդանյանը։

Նա նշեց, որ եթե իրավաբանը նման կերպ չի հարգում իր մասնագիտությունը, ապա փլուզվում է մի ամբողջ համակարգ։

«Այն ամենը, ինչ իրենք ներկայացնում են ահաբեկչության նախապատրաստություն, ոչ այլ ինչ է, քան յուրաքանչյուր տաքսիում, սրճարանում  և բակերի զրուցարաններում տեղի ունեցող խոսակցություններ»,-ասաց ընդդիմադիր պատգամավորը և նկատեց, որ եթե բակերում զրուցում են, ինչ-որ բան չեն ձեռք բերում գործողությունների համար, ապա բոլորը տեսան, թե Բագրատ Սրբազանի գործով իրավապահները ինչ են հայտնաբերել՝ գունավոր ճայթրուկներ, կոշիկի մեխեր։