«Ամեն որակման համար գլխով պատասխան եմ տալու». ՀՀ զինդատախազ

ՀՀ զինվորական դատախազը պատրաստ է ցանկացած հարցի քննարկման, միայն թե քննարկումը լինի մասնագիտական, ոչ թե հուզական մակարդակում։ «Բողոքի ակցիաների վերաբերյալ ասեմ, որ ես հասկանում եմ, եթե մարդիկ ընտրում են էմոցիոնալ բողոքի ձևը, սակայն դժվար է էմոցիոնալ քննարկումներ անցկացնել սպանված, զոհված մեր զինվորի ծնողի հետ»,- ասաց Կոստանյանը։

Բանախոսն ասաց, որ նախաքննության ընթացքի վերաբերյալ ցանկացած բողոք կարող է ներկայացվել սահմանված կարգով և ժամկետներում։ Նախաքննության ընթացքում թերացումներ են եղել մինչև անցած տարի, իսկ կոնկրետ 2011 թվականին կատարված որևէ դեպք, զինդատախազի վստահեցմամբ, չբացահայտված չի մնացել։ Նա հավաստիացրեց, որ անգամ գործի հետ առնչություն չունեցող պնդումներն ստուգվում են։

Լրագրողների ենթադրությանը, թե միգուցե որոշ դեպքեր խուսափում են որակել սպանություն, մինչդեռ դրանք սպանության հատկանիշերով են, Կոստանյանն արձագանքեց. «Որպես անձի՝ ինձ համար տարբերություն չկա, թե հանցագործն ինչ հոդվածով կդատապարտվի, սակայն որպես դատախազ՝ ամեն որակման համար գլխով պատասխան եմ տալու»։ Սպանություններն ինքնասպանություն որակելու հետ կապված կասկածներին ի պատասխան զինվորական դատախազն ասաց, որ եթե կապացուցվի թեկուզ մեկ դեպք, երբ սպանությունը կամ ինքնասպանության հասցնելն ինքնասպանություն է որակվել, ապա ինքը պատրաստ է հրաժարական տալու։

Իսկ հասարակության մեջ բանակում դժբախտ դեպքերի նվազման փոխարեն աճի տպավորությունը Կոստանյանը բացատրեց նրանով, որ Պաշտպանության նախարարությունն ու Զինվորական դատախազությունն սկսել են ավելի թափանցիկ աշխատել, դեպքերի հրապարակայնությունն է բարձրացել։