Microsoft-ը հեռացրել է չորս աշխատակցի՝ Պաղեստինի աջակցության բողոքի համար

Ամերիկյան տեխնոլոգիական հսկա Microsoft-ը հեռացրել է չորս աշխատակցի, որոնք մասնակցել էին Իսրայելի հետ կապերի դեմ կազմակերպված բողոքի ակցիաներին։ Ինչպես հայտնում է Reuters-ը, նրանք ներգրավված էին Վաշինգտոնի նահանգի Ռեդմոնդ քաղաքում գտնվող գլխավոր գրասենյակի դիմաց անցկացված բողոքի ցույցերում, իսկ երկու աշխատակից անգամ նստացույց էին իրականացրել ընկերության ղեկավարության գրասենյակում։

Ընկերության ղեկավարությունը նման վարք է որակել որպես անթույլատրելի և հակասող կորպորատիվ էթիկայի կանոններին։ Microsoft-ում նշել են, որ աշխատանքային վայրում կազմակերպված բողոքի ցույցերը «լուրջ անվտանգության մտահոգություններ» են առաջացրել։ Ակտիվիստական No Azure for Apartheid խմբի տվյալներով՝ ղեկավարությունը բողոքողներին հեռացման մասին տեղեկացրել է մեսենջերով ձայնային հաղորդագրությամբ։

Աշխատակիցները բողոքում էին այն փաստի դեմ, որ Microsoft-ը շարունակում է մատակարարումներ իրականացնել Իսրայելին, որի բանակը նոր հարձակումներ է սկսել Գազայի հատվածում։ Ըստ նրանց՝ ընկերության տեխնիկան կարող է օգտագործվել Մերձավոր Արևելքում ռազմական նպատակներով։