Հայաստանի և Ղազախստանի սահմանադրական դատարանները փոխըմբռնման հուշագիր են ստորագրել

Հայաստանի և Ղազախստանի սահմանադրական դատարանները փոխըմբռնման հուշագիր են ստորագրել , որի նպատակն է իրավական ոլորտում փոխգործակցության և համագործակցության շրջանակ ստեղծելը, սահմանադրական արդարադատության ոլորտում փորձի փոխանակումը։ 

Այս մասին հաղորդագրություն է տարածել ՀՀ Սահմանադրական դատարանը։ 

Հուշագրի ստորագրման արարողությունը տեղի է ունեցել ՀՀ Սահմանադրական դատարանի նախագահ Արման Դիլանյանի՝ Աստանա կատարած այցի շրջանակներում։ Նշվում է, որ ՀՀ ՍԴ նախագահը Ղազախստան է այցելել այդ երկրի Սահմանադրական դատարանի նախագահ Էլվիրա Ազիմովայի հրավերով։ 

Հուշագիրը ստորագրել են Հայաստանի և Ղազախստանի սահմանադրական դատարանների նախագահները։ 

Հուշագրի նպատակն է նպաստել իրավական ոլորտում փոխգործակցության և համագործակցության շրջանակի ստեղծմանը, սահմանադրական արդարադատության ոլորտում փորձի փոխանակմանը, երկու երկրներում սահմանադրական իրավունքի և դրա գործնական կիրառման ուսումնասիրությանը՝ սահմանադրական իրավունքի ոլորտում վեճերի լուծման համատեքստում՝ ձգտելով խթանել սահմանադրական արդարադատությունը և երաշխավորել համընդհանուր ճանաչում ունեցող ժողովրդավարական սկզբունքները, ինչպես նաև մարդու իրավունքների և քաղաքացիական ազատությունների պաշտպանության երաշխիքները։

Կարևորելով հուշագրի ստորագրմամբ հարաբերությունների նոր փուլի մեկնարկը՝ Հայաստանի Հանրապետության Սահմանադրական դատարանի նախագահ Արման Դիլանյանը հույս է հայտնել, որ հուշագրով նախանշված դրույթները գործնականում կիրականացվեն՝ դառնալով սահմանադրական արդարադատության ոլորտում հայ-ղազախական արդյունավետ համագործակցության գրավական։

Ղազախստանի Հանրապետության Սահմանադրական դատարանի նախագահ Էլվիրա Ազիմովան նշել է, որ իրենց համար շատ հետաքրքիր է սահմանադրական արդարադատության ոլորտում Հայաստանի Հանրապետության իրավակիրառ պրակտիկան՝ համոզմունք հայտնելով, որ հուշագրի ստորագրումը կարևոր հիմք  է երկու երկրների բարձր դատարանների միջև հարաբերությունների առավել զարգացման համար։

Պայմանավորվածություններ են ձեռք բերվել համագործակցությունն  ընդյալնել նաև երկու երկրների սահմանադրական դատարանների աշխատակազմերի միջև։