Մերցը պատմել է` ինչպես էր պատրաստվում Թրամփի «շոուին»

Գերմանիայի կանցլեր Ֆրիդրիխ Մերցը պատմել է, որ սպասում էր ԱՄՆ նախագահ Դոնալդ Թրամփի կողմից կազմակերպված «շոուին» և այդ պատճառով մանրակրկիտ պատրաստվել է Վաշինգտոն այցին։ Հունիսի 5-ին կայացած հանդիպման նախօրեին նա դիտել է նախկին այցերի տեսագրությունները՝ հասկանալու, թե ինչպես ճիշտ նստել և խոսել Թրամփի հետ։ «Սա նրա շոուն է, և նա պետք է այն ստանա», — ասել է Մերցը՝ ընդգծելով, որ իրեն տեսել է որպես հյուր։

Կանցլերը պատմել է, որ հանդիպման սկզբում հանգիստ նստած հետևել է, թե ինչպես է Թրամփը պատասխանում լրագրողների հարցերին, իսկ հետո ինքն ընդամենը մի քանի րոպե է խոսել։ Նրա խոսքով՝ այս մոտեցումը թույլ է տվել խուսափել ավելորդ լարվածությունից։

Օգոստոսի 16-ին Մերցը հայտնել էր, որ ուկրաինացի նախագահ Վլադիմիր Զելենսկուն նույնպես խորհուրդներ է տվել՝ ինչպես խուսափել նոր սկանդալից Սպիտակ տանը։ Ըստ գերմանական աղբյուրների՝ եվրոպացի մի շարք առաջնորդներ նույնպես պատրաստել են Զելենսկուն հանդիպմանը, իսկ Մեծ Բրիտանիայի վարչապետ Քիր Սթարմերը խորհուրդ է տվել հատուկ շնորհակալություն հայտնել Թրամփին և անգամ ճիշտ հագուստ ընտրել։