Մեզ երբեմն հայհոյում են՝ մենք չենք պատասխանում, բայց ոչ թե չենք կարող, այլ համեստ դիրք ենք վերցրել․ փոխքաղաքապետ

Մեկարկեց Երևանի ավագանու նիստի աշնանային նստաշրջանը և, բնականաբար, մի քանի ամսյա լռությունից հետո մեր ընդդիմությունն ամառային արձակուրդների ընթացքում երևի դիմել է ChatGPT-ին, թե նոր նստաշրջանին ինչեր կարող է ասել, ինչ կարող է ելույթ ունենալ։ Վստահ եմ՝ ChatGPT-ն հարցրել է, թե որ խմբակցությունից եք, իրենք գրել են «Մայր Հայաստան» կամ, օրինակ, Պեդրո Զարուկյան, և ինքն ասել է՝ ավելին չունեմ ասելու, ինչ կա, կարող եք կրկնել, ինչ ոճով հանդես եկել եք, այդպես էլ կարող եք հանդես գալ, որովհետև ձեր ասելիքը նույնն է։ Անգամ ChatGPT-ն ի զորու չէ ձեզ պատասխանել։ Այս մասին ավագանու նիստին ասաց Երևանի փոխքաղաքապետ Արմեն Փամբուխչյանը։

Նա նշեց, որ իրենց հաճախ դիմում են քաղաքացիներ կամ ընկերական շրջապատում, հարցնում, թե ինչու իրենք չեն պատասխանում ընդդիմության ելույթներին։

«Գուցե ոչինչ չկա պատասխանելու, ոչ թե բովանդակային առումով, այլ որովհետև էնքան դատարկություն է ու սնանկ տվյալ ելույթը կամ մեղադրանքը, որ մտքներովս չի անցնում, թե ինչպես կարելի է պատասխանել այդ սնանկությանը ․․․ Մենք սուրբ չենք ձևանում, մենք միջին վիճակագրական հայեր ենք, որ ապրում են Հայաստանում։ Ժողովրդի կամքով 7 տարի առաջ ստանձնել ենք իշխանությունը, մեր սխալներով, մեր թերություններով աշխատում ենք, մեզ քննադատում են՝ լսում ենք, մեզ երբեմն անգամ հայհոյում են՝ չենք պատասխանում, բայց դա նրանից չէ, որ չենք կարող պատասխանել, այլ ինչպես նշեցի՝ մենք մեր համեստ դիրքն ենք վերցրել և անցել մեր աշխատանքներին»,– ասաց Փամբուխչյանը։