Եվրոյի «համաշխարհային պահը» կարող է կորչել քաղաքական պառակտումների պատճառով

Եվրոպական կենտրոնական բանկի նախագահ Քրիստին Լագարդը դեռ մայիսին հայտարարել էր, որ Դոնալդ Թրամփի պաշտպանողական տնտեսական քաղաքականությունը եզակի հնարավորություն է Եվրոպայի համար՝ ամրապնդելու եվրոյի դերը համաշխարհային ֆինանսական համակարգում։ Սակայն Reuters-ի տվյալներով՝ նրա կոչերը մնացել են անպատասխան․ ԵՄ երկրները կրկին պառակտվել են և առաջնահերթությունները շեղվել են դեպի Ուկրաինայի պատերազմը, ԱՄՆ-ի հետ հարաբերությունները և ներքին ճգնաժամերը։

Եվրոյի դիրքերը ուժեղացնելու կարևոր քայլերը՝ համատեղ պարտքի թողարկումը, կապիտալի շուկաների միավորումը և թվային եվրոյի գործարկումը, բախվել են հակասությունների։ Գերմանիան ու Նիդերլանդները դեմ են ընդհանուր պարտքային պարտավորություններին, փոքր պետությունները՝ վերահսկողության կենտրոնացմանը, իսկ թվային եվրոյի նախագիծը տարիներ շարունակ ձգձգվում է։ Արդյունքում Եվրոպայի ամենահամարձակ նախաձեռնությունները մնում են թղթի վրա։

Այդ ընթացքում դոլարը շարունակում է գերիշխել՝ կազմելով համաշխարհային պահուստների շուրջ 60 տոկոսը և մնալով հիմնական արժույթն առևտրի ու էներգակիրների շուկայում։ Եվրոն պահպանում է երկրորդ տեղը՝ մոտ 20 տոկոսով, սակայն առանց խորը ֆինանսական ինտեգրման և ներդրողներին վստահություն ներշնչող «անվտանգ ակտիվների», ԵՄ-ն դժվար թե կարողանա մրցել ոչ միայն դոլարի, այլև երկարաժամկետ հեռանկարում՝ Չինաստանի յուանի հետ։