44-օրյայի քննիչ հանձնաժողովի զեկույցն ԱԺ լիագումար նիստ մտցնելու իրավական հիմք չկա․ Ալեն Սիմոնյան

44-օրյա պատերազմի հանգամանքներն ուսումնասիրող քննիչ հանձնաժողովի զեկույցը ԱԺ լիագումար նիստ մտցնելու իրավական հիմք չկա։ Ժամկետները կոնկրետ գրված, ֆիքսված են, թե երբ է հանձնաժողովն իր գործունեությունն իրականացնում և ավարտում։ Այս մասին լրագրողների հետ զրույցում ասաց ԱԺ նախագահ Ալեն Սիմոնյանը։

Նա նշեց, որ հանձնաժողովի նախագահ Անդրանիկ Քոչարյանն այլ կերպ է փորձում մեկնաբանել․ «Այն դեպքում, երբ մեկնաբանության խնդիր կա, այն իրականացնում է Պետական-իրավական հարցերի մշտական հանձնաժողովը։ Ունեմ ԱԺ–ից իրավաբանական վարչության տեղեկանքը, նաև մեր քարտուղարության մեկնաբանությունը, և այդ երեքի մեկնաբանությունն իդենտիկ են։ Պարոն Քոչարյանը կարող է մեկնաբանել ամեն ձև՝ իր ցանկությամբ, պատկերացումով, բայց ես նախադեպային իրավունքով չեմ առաջնորդվում»,– ասաց ԱԺ նախագահը։

Սիմոնյանը պնդեց, որ «Քոչարյանն իրավական առումով դեռ չի ուղարկել զեկույցը»։