ԵՄ-ն Ռուսաստանից սառեցված ակտիվների եկամուտները ուղղում է ուկրաինական դրոններին

Եվրոպական հանձնաժողովը Ուկրաինային է փոխանցել 4 միլիարդ եվրոյի նոր տրանշ, որը ձևավորվել է սառեցված ռուսական ակտիվների եկամուտներից, տեղեկացնում է կառույցի կայքը։ Գումարի կեսը նախատեսվում է օգտագործել անօդաչու սարքերի արտադրության և գնումների համար։

Տարվա սկզբից ի վեր ԵՄ-ի ֆինանսական աջակցության շրջանակում Կիևը արդեն ստացել է 14 միլիարդ եվրո, իսկ ընդհանուր աջակցությունը պատերազմական շրջանից ի վեր հասնում է մոտ 178 միլիարդ եվրոյի։ Գերմանիայի կանցլեր Ֆրիդրիխ Մերցը հայտարարել է, որ Բեռլինը կողմ է Ռուսաստանի ակտիվների հաշվին Ուկրաինային անտոկոս վարկ տրամադրելուն, որը պետք է վերադարձվի միայն այն դեպքում, եթե Մոսկվան փոխհատուցի Ուկրաինային հասցված վնասը։

Ավելի վաղ Եվրահանձնաժողովի նախագահ Ուրսուլա ֆոն դեր Լայենն ընդգծել էր, որ այսպես կոչված «ռեպարացիոն վարկի» մի մասը կուղղվի եվրոպական պաշտպանական գնումներին։ Մասնագետները զգուշացնում են, որ այս սխեման կարող է վանել ներդրողներին, որոնք այն կարող են դիտարկել որպես միջոցների փաստացի բռնագրավում՝ հաշվի առնելով, որ Ռուսաստանի կողմից փոխհատուցման հավանականությունը ցածր է գնահատվում, հայտնում է Лента.ру-ն։