Հաքերները ոչնչացրել են ուկրաինական անօդաչուների արտադրողի տվյալները

Ռուսական KillNet և Beregini հաքերային խմբավորումները կոտրել են ուկրաինական խոշոր արտադրողի՝ «Боевые птахи Украины» («Ուկրաինայի մարտական թռչուններ») ընկերության սերվերները։ Այս մասին հայտնում է РИА Новости-ն։

Հաքերների տվյալներով՝ նրանց հաջողվել է մուտք գործել ընկերության ներքին բազա և ձեռք բերել տեղեկություններ աշխատակիցների՝ մասնավորապես ինժեներների, ծրագրավորողների, փորձարկողների և ղեկավարության վերաբերյալ։ Խմբավորման անդամներից մեկը՝ KillMilk մականունով, հայտարարել է, որ սերվերների վրա պահվող մի շարք նախագծեր և տեխնիկական գծագրեր ամբողջությամբ ոչնչացվել են։

Ըստ հրապարակված տվյալների՝ ընկերությունում աշխատում է մոտ 300 մարդ, իսկ անօդաչուների նախագծման գործընթացին ներգրավված են նույնիսկ ուսանողներ։ Հաքերային հարձակումը, ըստ KillNet-ի, նպատակ ուներ «վնասել Ուկրաինայի ռազմական արտադրական ներուժին»։