Զախարովան՝ հայ վարորդների առջև ծառացած խնդիրների մասին

Ռուսաստանի արտաքին գործերի նախարարության խոսնակ Մարիա Զախարովան մեկնաբանել է բեռնատարների հայ վարորդների դժգոհությունը՝ կապված Ռուսաստանում նոր ներգաղթային կանոնակարգերի հետ։

Նրա խոսքով՝ այս խնդրով զբաղվում են Հայաստանի և Ռուսաստանի համապատասխան մարմինները, այդ թվում՝ Ներքին գործերի նախարարությունը և Տրանսպորտի նախարարությունը։

«Բոլորը հանձնառու են արագ կարգավորմանը», - նշել է Զախարովան՝ պարզաբանելով, որ խնդրի լուծման համար դեռևս հստակ ժամկետ չկա։

Հիշեցնենք` 2025թ–ի հունվարի 1-ից ոչ վիզային ռեժիմի երկրների քաղաքացիները, որոնք ՌԴ են մուտք գործում ոչ աշխատելու նպատակով (այսինքն՝ միգրացիոն քարտում «այցի նպատակը» բաժնում աշխատանքը նշված չէ- խմբ․), օրացույցային տարվա ընթացքում կարող են մնալ 90 օր (նախկինում թույլատրելի էր տարվա յուրաքանչյուր 180 օրվա մեջ 90 օր- խմբ․)։ Այս փոփոխությունը վերաբերում է նաև ուղևորափոխադրում և բեռնափոխադրում իրականացնողներին։

Նշենք, որ հայաստանցի վարորդները պարբերաբար բողոքի ակցիաներ են կազմակերպում այս սահմանափակումների դեմ` նշելով, որ 90 օրը քիչ է, քանի որ շատ ժամանակ ուղղակի ստիպված են լինում օրերով կանգնել Լարսում առաջացող հերթերի մեջ։