Ընթանում է ՀԱԿ-ի ակտիվիստների դատը

Այս պահին Երևանի Կենտրոն և Նորք-Մարաշ վարչական շրջանների ընդհանուր իրավասության դատարանում շարունակվում է քաղբանտարկյալ, ՀԱԿ ակտիվիստ, Տիգրան Առաքելյանի դատավարությունը։ Այսօր դատարանում վկայություն են տալու ՀԱԿ այն ակտիվիստները, որոնք ներկա են եղել Տիգրան Առաքելյանի և ոստիկանների միջև տեղի ունեցած բախմանը։

Հիշեցնենք, որ կիրակի օրը՝ հունվարի 22-ին, միջազգային իրավապաշտպան "Human Rights Watch" կազմակերպության հրապարակած հերթական տարեկան զեկույցում անդրադարձ էր կատարվել նաև Հայ Ազգային կոնգրեսի երիտասարդ ներկայացուցիչների օգոստոսյան ձերբակալությանը։ «Ոստիկանությունը ծեծի ենթարկեց եւ ձերբակալեց ՀԱԿ մի քանի ակտիվիստների, յոթին մեղադրանք առաջադրվեց խուլիգանության ու իշխանության ներկայացուցչի նկատմամբ բռնություն գործադրելու համար։ Ու թեեւ բժիշկները նրանց մոտ վնասվածքներ էին հայտնաբերել, այդուամենյանիվ, որեւէ քննություն չիրականացվեց ոստիկանության գործողությունների շուրջ», - արձանագրում է իրավապաշտպան կազմակերպությունը. «Ազատություն» ռադիոկայանի հաղորդմամբ։