ԱՊՀ-ի գործկոմը Համագործակցության երկրների հետ համաձայնեցնում է Կիևում ԱԳ նախարարների խորհրդի նիստի անցկացումը

Ինչպես արդեն հաղորդվել է, ԱՊՀ-ի գործադիր կոմիտեն ստացել է Ուկրաինայի ԱԳ նախարարության նոտան՝ մարտի 7-ին Կիևում ԱՊՀ-ի երկրների արտաքին գործերի նախարարների խորհրդի արտահերթ նիստ անցկացնելու առաջարկով՝ նվիրված երկրի առանձին տարածաշրջաններում, մասնավորապես, Ղրիմի Ինքնավար Հանրապետությունում, ստեղծված իրադրությանը: Այս մասին տեղեկացրել են ԱՊՀ-ի գործկոմի մամուլի ծառայությունից:

Սահմանված կարգին համապատասխան, գործադիր կոմիտեն Ուկրաինայի ԱԳ նախարարության նոտան ուղարկել է Համագործակցության մասնակից պետությունների արտաքին քաղաքական գերատեսչություններին և ներկայումս նրանց հետ աշխատում է ԱԳ նախարարների խորհրդի արտահերթ նիստի անցկացման հետ կապված կազմակերպչական հարցերի շուրջ՝ նկատի առնելով, որ այն տեղի կունենա մոտ ժամանակներս:

Ավելի վաղ ԱՊՀ-ի համակարգող ինստիտուտներին առընթեր Ուկրաինայի մշտական լիազոր ներկայացուցիչ Իվան Բունեչկոն հայտնել է, որ ԱՊՀ-ն նախագահող Ուկրաինան առաջարկություն է արել Կիևում ԱՊՀ-ի երկրների արտաքին գործերի նախարարների խորհրդի արտահերթ նիստը մարտի 7-ից տեղափոխել մարտի 12-ին:

«Այն բանի կապակցությամբ, որ առանձին երկրներ պատրաստ չեն մարտի 7-ին ԱԳՆԽ-ի արտահերթ նիստի անցկացմանը, ինչպես նաև հաշվի առնելով այն, որ մի շարք նախարարներ, ելնելով աշխատանքի իրենց գրաֆիկից, հնարավորություն չունեն այդ օրը մասնակցել միջոցառմանը, մենք առաջարկեցինք նիստը տեղափոխել մարտի 12-ին»,-ասել է նա: