Ղրիմի ճգնաժամը պետք է լուծվի Ուկրաինայի տարածքային ամբողջականության հիման վրա. Պան Գի Մուն

ՄԱԿ-ի գլխավոր քարտուղար Պան Գի Մունն անհանգստացած է Ուկրաինայի և, մասնավորապես, Ղրիմի իրադարձությունների զարգացումից: Նա կոչ է արել ճգնաժամից դուրս գալու ելքը գտնել ՄԱԿ-ի Կանոնադրության սկզբունքների հիման վրա, ներառյալ վեճերի խաղաղ լուծումը և Ուկրաինայի միասնության, ինքնիշխանության և տարածքային ամբողջականության հարգումը:

Այդ մասին ասված է այն հայտարարության մեջ, որով ՄԱԿ-ի գլխավոր քարտուղարի անունից հանդես է եկել նրա մամուլի քարտուղար Ստեֆան Դյուժարիկը:

«Այս օրհասական պահին մենք չենք կարող մեզ թույլ տալ սխալներ կամ անգործություն: Ճգնաժամի լուծումը պետք է խարսխվի, նախևառաջ, ՄԱԿ-ի Կանոնադրության սկզբունքների վրա, ներառյալ վեճերի խաղաղ լուծումը և Ուկրաինայի միասնության, ինքնիշխանության և տարածքային ամբողջականության հարգումը»,-հայտարարել է ՄԱԿ-ի ղեկավարը:

Պան Գի Մունն ուղղակի երկխոսության կոչ է արել Կիևի և Մոսկվայի միջև, ինչից հրաժարվում է ռուսական կողմը: ՄԱԿ-ի ղեկավարն ընդգծել է, որ «միջազգային հանրակցությունը պետք է օգնի հիմնական խաղորդներին՝ հանդարտեցնելու իրադրությունը և առաջ շարժվելու դեպի հաստատուն և արդար քաղաքական կարգավորում»:

ՄԱԿ-ի գլխավոր քարտուղարը նախազգուշացրել է, որ իրադրության հետագա վատթարացումը լուրջ հետևանքներ կունենա Ուկրաինայի ժողովրդի, տարածաշրջանի և համաշխարհային հանրակցության համար: