Ղրիմի իշխանություններն ստացել են 21 երկրի ներկայացուցիչների համաձայնությունը՝ հետևելու հանրաքվեի ընթացքին

Աշխարհ 13 Մարտ, 2014 17:03

Ղրիմի իշխանությունները մարտի 16-ի հանրաքվեի ընթացքին հետևելու համար ստացել են 21 երկրից 50 դիտորդների համաձայնությունը: Այդ մասին լրագրողներին հայտնել է Ղրիմի Գերագույն խորհրդի՝ հանրաքվեի նախապատրաստման հանձնաժողովի ղեկավար Միխայիլ Մալիշևը: Այս մասին հայտնում է itar-tass-ը:

Նրա խոսքով՝ նրանք Իսրայելի, ԱՄՆ-ի, Ֆրանսիայի, Իտալիայի, ներկայացուցիչներն են, այդ թվում՝ Եվրախորհրդարանի մի շարք պատգամավորներ:

Ղրիմի հանրաքվեի վերջնական արդյունքները հայտնի կդառնան մարտի 17-ին, ասել է Մալիշևը:

Ղրիմի իշխանությունները կքննարկեն ԵԱՀԿ-ի դիմումը հանրաքվեին նրանց դիտորդների մասնակցության մասին, եթե այն ստանան: Մալիշևը, այնուամենայնիվ, կասկած է հայտնել, թե այդպիսի դիմում հանձնաժողովը կստանա:

Նախօրյակին Ղրիմի Հանրապետության Նախարարների խորհրդի առաջին փոխնախագահ Ռուստամ Տեմիրգալիևը միջազգային բոլոր դիտորդներին կոչ է արել ժամանել ինքնավար հանրապետություն՝ օբյեկտիվորեն լուսաբանելու մարտի 16-ին կայանալիք հանրաքվեն:

«Հանրապետական իշխանությունները պաշտոնական մանդատ ունեցող միջազգային դիտորդներին հրավիրում են գրանցվել հանրապետական ընտրական հանձնաժողովում, ձևակերպել համապատասխան փաստաթղթերը և օբյեկտիվորեն լուսաբանել ղրիմցիների կամաարտահայտման ընթացքը»,-հայտարարել է Տեմիրգալիևը:

Մինչդեռ ԵԱՀԿ-ն անօրինական է ճանաչել Ղրիմի կարգավիճակի շուրջ հանրաքվեն: ԵԱՀԿ-ի նախագահ, Շվեյցարիայի արտաքին գործերի նախարար Դիդիե Բուրկհալտերը հայտարարել է, որ հանրաքվեն հակասում է Ուկրաինայի սահմանադրությանը և պետք է անօրինական համարվի: Նրա խոսքով՝ Ղրիմի ինքնավարության աստիճանի կամ անկախության շուրջ հանրաքվեն պետք է հիմնվի Ուկրաինայի սահմանադրության վրա և պետք է համապատասխանի միջազգային իրավունքի սկզբունքներին: Նա կոչ է արել բոլոր շահագրգիռ կողմերին ձեռնպահ մնալ ոչ սահմանադրական գործողություններից, ինչպես նաև բացառել հա նրաքվեին ԵԱՀԿ-ի դիտորդների ուղարկելու հնարավորությունը:

Բուրկհալտերը նշել է, որ, բացի հանրաքվեի ոչ սահմանադրական լինելուց, դիտորդներ ուղարկելու ևս մեկ խոչընդոտ է Ուկրաինայի իշխանությունների կողմից հրավերի բացակայությունը՝ նկատի առնելով այն, որ հանրաքվեին հետևելու հրավերն ուղարկվել է ոչ թե Կիևի, այլ Ղրիմի խորհրդարանի կողմից: