Ռուսաստանը և Ուկրաինան ՄԱԿ-ում հայտարարել են, որ իրենք պատերազմ չեն ցանկանում

Ուկրաինայի վարչապետ Արսենի Յացենյուկը Նյու Յորքում ելույթ է ունեցել ՄԱԿ-ի Անվտանգության խորհրդի նիստում, որը նվիրված էր Ռուսաստանի և Ուկրաինայի միջև ճգնաժամային իրադրության քննարկմանը: Նա հայտարարել է, թե իր երկիրը ռազմական ագրեսիայի զոհ է դարձել Ռուսաստանի կողմից: Այս մասին հայտնում է BBC-ն:

Յացենյուկն ընդգծել է, որ նման ագրեսիվ քաղաքականությունն անընդունելի է 21-րդ դարում, ընդսմին հավելելով, որ Կիևը չի կորցնում հակամարտությունը խաղաղ ճանապարհով կարգավորելու հույսը: Նա կոչ է արել Մոսկվային զորքերը դուրս բերել Ղրիմից և ուղղակի բանակցություններ սկսել հակամարտության լուծման շուրջ, որը, նրա խոսքով, արդեն վաղուց դուրս է եկել Ուկրաինայի սահմաններից:

«Ուկրաինայի կառավարությունը պատրաստ է երկխոսության: Մենք բանակցություններ ենք ցանկանում, այլ ոչ թե ռազմական ագրեսիա»,-հայտարարել է Յացենյուկը, ով ելույթ էր ունենում անգլերենով:

Այնուհետև նա ռուսերենով դիմել է դահլիճում նստած ռուսական պատվիրակությանը և հարցրել. «Ռուսները ցանկանո՞ւմ են արդյոք պատերազմ»:

«Ռուսները Ղրիմում պատերազմ չեն ցանկանում, ինչպես և ուկրաինացիները»,-պատասխանել է ՄԱԿ-ում ՌԴ-ի մշտական ներկայացուցիչ Վիտալի Չուրկինը` հավելելով, որ Ռուսաստանը չի ցանկանում նաև «իրադրության հետագա էսկալացում»:

Սակայն Ռուսաստանի ներկայացուցիչը չի պատասխանել խաղաղ բանակցություններ սկսելու Յացենյուկի կոչին և Կիևի նոր իշխանություններին մեղադրել է այն բանում, որ նրանք «Ուկրաինան պառակտում են երկու մասի»:

ՄԱԿ-ի ԱԽ-ում Արսենի Յացենյուկի ելույթը հիմնականում նվիրված էր Ղրիմի իրադրությանը: Նա ընդգծել է, որ Ուկրաինայի իշխանությունները չեն ճանաչի Ղրիմի հանրաքվեի արդյունքները: «Ղրիմը կա, կլինի ու կմնա Ուկրաինայի անբաժանելի մասը»,-ասել է Յացենյուկը:

Մինչդեռ արևմտյան դիվանագետներն ակտիվացնում են ջանքերը՝ ուղղված հակամարտության սաստկացումից խուսափելուն:

Մարտի 14-ին ԱՄՆ-ի պետքարտուղար Ջոն Քերին վերստին պետք է հանդիպում ունենա Ռուսաստանի ԱԳ նախարար Սերգեյ Լավրովի հետ, այս անգամ՝ Լոնդոնում: