ԱՄՆ-ն Ուկրաինայի վերաբերյալ ՄԱԿ-ի ԱԽ-ի բանաձևի նախագծում առաջարկել է դատապարտել Ղրիմի հանրաքվեն

Համաշխարհային հանրակցության կողմից Ղրիմի հանրաքվեի արդյունքները չճանաչելն Ուկրաինայի իրադրության վերաբերյալ բանաձևի նախագծի հանգուցային դրույթներից մեկն է, որը ՄԱԿ-ի Անվտանգության խորհրդին ներկայացվել է ամերիկացիների կողմից: Այդ մասին ՄԱԿ-ի ԱԽ-ի նիստից հետո լրագրողներին հայտնել է այդ կազմակերպությանն առընթեր ԱՄՆ-ի մշտական ներկայացուցիչ Սամանթա Փաուերը:

«Ես կարծում եմ՝ կարևոր է, որ բանաձևի նախագիծը ներառում է հանգուցային բաղադրիչները՝ աջակցությունն Ուկրաինայի տարածքային ամբողջականությանը, ինքնիշխանությանն ու անկախությանը, Ղրիմի հանրաքվեի անօրինականության արձանագրումը, որն անցկացվում է առանց Ուկրաինայի համաձայնության, համաշխարհային հանրակցությանն ուղղված կոչը՝ չճանաչել այդ անօրինական հանրաքվեի արդյունքները»,-հայտարարել է Փաուերը:

Նրա խոսքով՝ Ղրիմում նշանակված կիրակնօրյա հանրաքվեն, ի տարբերություն Ուկրաինայի մայիսի 25-ի նախագահական ընտրությունների, անօրինական է և ոչնչով արդարացված չէ: «Ղրիմում ցանկացած հանրաքվե պետք է անցկացվի Ուկրաինայի օրենսդրության շրջանակներում, և ԱՄՆ-ը, մյուս երկրների հետ միասին, կոչ է անում կանգնեցնել այն»,-հավելել է նա:

«Ես հուսով եմ, որ Ռուսաստանը լսել է Անվտանգության խորհրդի 15 անդամներից 14-ի ձայները, որոնք այսօր հանդես են եկել Ուկրաինայի տարածքային ամբողջականությունն ու ինքնիշխանությունը պահպանելու օգտին»,-ասել է դիվանագետը:

Նրա խոսքով՝ ԱՄՆ-ի կողմից Ուկրանայի իրադրության վերաբերյալ ԱԽ-ին ներկայացված բանաձևի նախագիծը «կարող է ցույց տալ այն մեկուսացման աստիճանը, որում հայտնվել է Ռուսաստանը՝ ընթանալով հիմնախնդրի լուծման ոչ խաղաղ ճանապարհով»: 

Ավելի վաղ ՄԱԿ-ին առընթեր Մեծ Բրիտանիայի մշտական ներկայացուցիչ Մարկ Լայալ Գրանտը լրագրողներին հայտնել է, որ Անվտանգության խորհրդում Ուկրաինայի իրադրության վերաբերյալ բանաձևի ամերիկյան նախագծի շուրջ քվեարկությունը տեղի կունենա մարտի 15-ից ոչ ուշ: