Մոսկվան կոչ է արել ԵԱՀԿ-ին՝ դիտորդներ ուղարկել Ղրիմի հանրաքվեին

Ռուսաստանի արտաքին գործերի նախարարությունը մարտի 14-ին կոչ է արել ԵԱՀԿ-ին՝ հրաժարվել «երկակի ստանդարտների» պրակտիկայից և դրական միտումով քննարկել մարտի 16-ին Ղրիմում կայանալիք հանրաքվեի մոնիթորինգին մասնակցելու ինքնավար հանրապետության իշխանությունների հրավերը:

«Ռուսաստանի ԱԳ նախարարությունը կոչ է անում ԵԱՀԿ-ի ղեկավարությանը, մասնակից երկրներին և Ժողովրդավարական ինստիտուտների և մարդու իրավունքների բյուրոյին՝ հրաժարվել «երկակի ստանդարտների» պրակտիկայից և դրական պատասխան տալ առաջիկա հանրաքվեի դիտարկմանը մասնակցելու Ղրիմի իշխանությունների հրավերին, ինչը կհամապատասխանի ԵԱՀԿ-ի հիմնարար սկզբունքներին և կնպաստի տարածաշրջանի իրադրության ապաէսկալացմանը»,-ասված է ՌԴ ԱԳ նախարարության կայքում զետեղված մեկնաբանության մեջ:

Մինչդեռ ԵԱՀԿ-ն անօրինական է ճանաչել Ղրիմի կարգավիճակի շուրջ հանրաքվեն: ԵԱՀԿ-ի նախագահ, Շվեյցարիայի արտաքին գործերի նախարար Դիդիե Բուրկհալտերը հայտարարել է, որ հանրաքվեն հակասում է Ուկրաինայի սահմանադրությանը և պետք է անօրինական համարվի: Նրա խոսքով՝ Ղրիմի ինքնավարության աստիճանի կամ անկախության շուրջ հանրաքվեն պետք է հիմնվի Ուկրաինայի սահմանադրության վրա և պետք է համապատասխանի միջազգային իրավունքի սկզբունքներին: Նա կոչ է արել բոլոր շահագրգիռ կողմերին ձեռնպահ մնալ ոչ սահմանադրական գործողություններից, ինչպես նաև բացառել հանրաքվեին ԵԱՀԿ-ի դիտորդների ուղարկելու հնարավորությունը:

Բուրկհալտերը նշել է, որ, բացի հանրաքվեի ոչ սահմանադրական լինելուց, դիտորդներ ուղարկելու ևս մեկ խոչընդոտ է Ուկրաինայի իշխանությունների կողմից հրավերի բացակայությունը՝ նկատի առնելով այն, որ հանրաքվեին հետևելու հրավերն ուղարկվել է ոչ թե Կիևի, այլ Ղրիմի խորհրդարանի կողմից: