Դոնեցկում տեղի ունեցած բախումներից տուժածների թիվը հասել է 26-ի, մարզում սգո օր է հայտարարված

Ինչպես հայտնում է ria.ru-ն, Ուկրաինայի Դոնեցկ քաղաքում տեղի ունեցած զանգվածային բախումներից հետո բժիշկներին օգնության դիմած մարդկանց թիվը հասել է 26-ի, հայտնել է Դոնեցկի պետական մարզային վարչակազմի առողջապահության դեպարտամենտի փոխնախագահ-տնօրեն Ելենա Պետրյաևան:

Դոնեցկի Լենինի հրապարակում մարտի 13-ին միաժամանակ տեղի են ունեցել երկու ակցիաներ՝ ռուսամետ և «Հանուն միասնական Ուկրաինայի» անվանման ներքո: Ընդհարումներն սկսվել են հանուն երկրի միասնության հանրահավաքի ավարտից անմիջապես հետո: Ավելի վաղ հաղորդվել էր, որ ընդհարումների հետևանքով զոհվել է մեկ, վիրավորվել՝ 17 մարդ, նրանցից 13-ը` հոսպիտալացվել են:

Պետրյաևայի խոսքով՝ տուժածներից ամենաավագը եղել է 57 տարեկան, ամենակրտսերը՝ 19 տարեկան: Այս պահին մարզի բժշկական հիմնարկներում ստացիոնար բուժման է պառկած չորս մարդ: Տուժածներից մեկը գտնվում է ծանր վիճակում, նրան վիրահատել են:

Դոնեցկի մարզում մարտի 14-ը սգո օր է հայտարարված:

Դոնեցկում տեղի ունեցած ընդհարումների կապակցությամբ ՌԴ-ի արտաքին գործերի նախարարությունը մարտի 14-ին հայտարարել է, որ Կիևի իշխանությունները չեն վերահսկում երկրի իրադրությունը, և այդ իրավիճակում Մոսկվան իրեն իրավունք է վերապահում Ուկրաինայում պաշտպանության տակ վերցնելու հայրենակիցներին: