ԱՄՆ-ն երբեք չի ճանաչի Ղրիմի հանրաքվեն. Օբամա

ԱՄՆ-ի նախագահ Բարաք Օբաման Ռուսաստանի իր պաշտոնակցի՝ Վլադիմիր Պուտինի հետ կայացած հեռախոսազրույցի ընթացքում ընդգծել է, որ ոչ ԱՄՆ-ն, ոչ էլ միջազգային հանրակցությունը երբեք չեն ճանաչի այն հանրաքվեն, որը խախտում է Ուկրաինայի Սահմանադրությունը և անցկացվել է Ռուսաստանի ռազմական ինտերվենցիայի ճնշման ներքո, տեղեկացնում է Սպիտակ տան տարածած հաղորդագրությունը:

Օբամայի խոսքով՝ Ռուսաստանի գործողությունները խախտում են Ուկրաինայի ինքնիշխանությունը և տարածքային ամբողջականությունը: Նա հայտարարել է, թե ԱՄՆ-ը պատրաստ է եվրոպացի գործընկերների հետ միասին լրացուցիչ պատժամիջոցներ սահմանել Ռուսաստանի նկատմամբ:

ԱՄՆ-ի նախագահի խոսքով՝ դիվանագիտական լուծման անկարելի է հասնել, քանի դեռ Ռուսաստանի զինված ուժերը շարունակում են ինտերվենցիան Ուկրաինայի տարածի դեմ, իսկ Ուկրաինայի հետ սահմանում Ռուսաստանի լայնածավալ զորավարժությունները միայն սաստկացնում են լարվածությունը:

«Ղրիմում կայացած հանրաքվեի կապակցությամբ Պուտինը ուշադրություն է հրավիրել այն բանի վրա, որ դրա անցկացումը լիովին համապատասխանել է միջազգային իրավունքի և ՄԱԿ-ի Կանոնադրության նորմերին և հաշվի է առել, մասնավորապես, Կոսովոյի հայտնի նախադեպը: Դրա հետ մեկտեղ թերակղզու բնակիչներին երաշխավորված է եղել ազատ կամաարտահայտման և ինքնորոշման հնարավորությունը»,-նշվում է Ռուսաստանի նախագահի կայքում զետեղված հաղորդագրության մեջ: