Եվրախորհրդարանը կազմել է «Մագնիտսկու ցուցակը» և ԵՄ-ին կոչ է անում ընդունել այն

Եվրախորհրդարանի արտաքին գործերի կոմիտեն մարտի 18-ին կազմել է «Մագնիտսկու ցացակը»՝ Եվրամիության խորհրդից պահանջելով արգելել Ռուսաստանի 32 քաղաքացիների այցագրեր տալը և սառեցնել նրանց հաշիվները: Այս մասին հայտնում է ԵԽ-ի մամուլի ծառայությանը:

«ԵՄ-ի խորհուրդը պետք է կազմի այն անձանց ընդհանուր ցուցակը, որոնք պատասխանատու են համարվում ռուսաստանցի իրավաբան Սերգեյ Մագնիտսկու խոշտանգումների և մահվան, դրա իրավաբանական պարտակչության և նրա մոր ու այրու տեւական հալածանքների համար: Այդ պաշտոնատար անձանց անհրաժեշտ է արգելել ուղեւորությունները Եվրամիության երկրներ, ԵՄ-ում նրանց ակտիվները պետք է կալանադրվեն»,- ասված է բանաձևի տեքստում:

Կոմիտեն հրապարակել է այն անձանց ցուցակը, որոնց դեմ, նրա կարծիքով՝ հարկ է սահմանել այդ պատժամիջոցները: Նրանցից տասնվեց մարդ արդեն մտցված է ԱՄՆ-ի պատժամիջոցների ցուցակ: Պատգամավորները նաև քննադատել են Եվրամիության դիվանագիտության ղեկավար Քեթրին Էշթոնի դիրքորոշումը, որը, նրանց խոսքով՝ «Մագնիտսկու» եվրոպական «ցուցակի» հարցը չի բարձրացրել ԵՄ-ի երկրների արտաքին գործերի նախարարություների ղեկավարների նիստերում, թեև ԵԽ-ն տակավին 2012 թվականի հոկտեմբերին ընդունել է համապատասխան կոչով բանաձև:

Սպասվում է, որ կոմիտեի բանաձևը Եվրախորհրդարանի լիագումար նստաշրջանի քննարկմանը կներկայացվի ապրիլին: Պատժամիջոցների վերաբերյալ ԵԽ-ի նստաշրջանի որոշումները կրում են հանձնարարական բնույթ, քանի որ սահմանափակող միջոցառումներին հավանություն է տալիս և դրանք ընդունում է ԵՄ-ի խորհուրդը: